Azərbaycan, Bakı, 3 noyabr /Trend, müxbir K.Zərbalıyeva/
Azərbaycan vətəndaşları ilə ailə quran əcnəbilərin əksəriyyəti Gürcüstan və Rusiya vətəndaşlarıdır.
Bu barədə Trend-ə Ədliyyə Nazirliyinin Bakı nikah evinin müdiri Həqiqət Səlimova məlumat verib.
Bakı nikah evinin müdirinin sözlərinə görə, əvvəlki illərdə İran və Türkiyə vətəndaşları ilə bağlanan nikahlar üstünlük təşkil edirdisə, son illərdə Gürcüstan və Rusiya vətəndaşları ilə bağlanan nikahların sayı daha çoxdur.
"Azərbaycan vətəndaşları ilə nikaha girənlər daha çox Gürcüstan və Rusiya vətəndaşlarıdır. Onların əksəriyyəti isə milliyyətcə azərbaycanlıdır", - Səlimova qeyd edib.
O bildirib ki, ümumiyyətlə, əvvəlki illərlə müqayisədə Azərbaycan vətəndaşlarının əcnəbilərlə nikahlarının sayı azalır.
Səlimovanın sözlərinə görə, Azərbaycanda MDB ölkələrindən olan vətəndaşlarla nikahlar Vətəndaşlıq Vəziyyəti Aktlarının Qeydiyyatı orqanlarının (VVAQ) şöbələri, digər ölkələrdən olan əcnəbilərlə nikahlar isə Bakı nikah evi tərəfindən qeydə alınır.
Dövlət Statistika Komitəsinin məlumatına görə, bu ilin 9 ayında Azərbaycanın VVAQ orqanlarında 53 min nikah, 6,5 min boşanma qeydə alınıb.
Ədliyyə Nazirliyinin Vətəndaşlıq Vəziyyəti Aktlarının Reyestri Xidmətinin ötən ilin yekunları ilə bağlı mətbuata verdiyi məlumatda bildirilirdi ki, Azərbaycanda 2009-cu ildə əcnəbilər və vətəndaşlığı olmayan şəxslərlə bağlanan nikahların sayı artıb.
Ötən il Azərbaycanda qeydə alınan 78 min 73 nikahdan 2221-də tərəflərdən biri əcnəbi və ya vətəndaşlığı olmayan şəxs olub. 2008-ci illə müqayisədə belə nikahların sayı 366 fakt artıb. Belə ki, 2008-ci ildə əcnəbilər və vətəndaşlığı olmayan şəxslərlə 1855 nikah bağlanıb.
Ötən il respublika üzrə 7789 boşanma faktı qeydə alınıb. 2008-ci illə müqayisədə ötən il boşanmalar 125 fakt azalıb. Bir tərəfi əcnəbi olan boşanmaların sayı 2008-ci illə müqayisədə 33 fakt artaraq 81 təşkil edib.
