Azərbaycan Təhsil Nazirliyi məktəblərə şagirdlərin sayından asılı olaraq psixoloq təyin edəcək

Azərbaycan, Bakı, 9 noyabr /Trend, müxbir М.Əliyev/

Azərbaycan məktəblərində psixoloqların sayı təhsil müəssisələrində oxuyan şagirdlərin sayından asılı olacaq. Bu barədə Trend-ə təhsil nazirinin müavini İradə Hüseynova deyib.

Bundan əvvəl şagirdlərin sayından asılı olmayaraq, hər məktəbdə bir psixoloq ştatı ayrılıb.

"Son illər Təhsil Nazirliyi psixoloqların məktəblərə cəlb olunması üzrə fəal iş aparır", - Hüseynova deyib.

Azərbaycanın 4 552 dövlət ümumtəhsil məktəbində 170 minə yaxın müəllim fəaliyyət göstərir və 1,42 milyon şagird təhsil alır. 17 özəl ümumtəhsil məktəbində 1 005 müəllim çalışır.

"Biz məktəblərdə psixoloqların fəaliyyətinin çox vacib və aktual olduğunu anlayırıq. Onların fəaliyyəti məktəblilərin düzgün istiqamətləndirilməsinə yönəldilib", - Hüseynova deyib.

Onun sözlərinə görə, Təhsil Nazirliyi məktəblərdə test imtahanları yolu ilə bütün boş qalmış pedaqoji yerlərin tutulmasını tədricən həyata keçirəcək.

2010-cu ildə Azərbaycanda müəllimlərin işə qəbulu üzrə müsabiqənin yekunlarına görə, 226 nəfər uğur qazanıb. Ötən il Təhsil Nazirliyi 2009/2010-cu tədris ili üçün ümumtəhsil məktəblərində 365 boş yerin tutulması üzrə müsabiqə keçirib.