Azərbaycan, Bakı, 30 noyabr /Trend, müxbir M.Əliyev/
Azərbaycan Prezidenti yanında Elmin İnkişafı Fondu elmi layihələrin növbəti müsabiqəsini elan edib. Bu barədə çərşənbə axşamı Trend-ə fonddan məlumat verilib.
"Elmi layihələrin ikinci müsabiqəsi qısasmüddətli xarakter daşıyır, təkliflər dekabrın 3-dək qəbul olunur", - fonddan bildiriblər.
Müsabiqədə qalib gələn layihələrin maliyyələşdirilməsinə 1 435 min manat vəsait ayrılacaq. Bunun 500 min manatı Yer haqqında elm sahəsində tədqiqatlar üçün elektron avadanlıqların və proqram təminatının, 400 min manatı molekulyar biologiya sahəsində tədqiqatlar üçün avadanlıqların, 435 min manatı fizika sahəsində müasir tədqiqatlar üçün yeni nanostruktur materialların alınmasına, 50 min manatı Azərbaycan tarixi haqqında üçcildliyin, 50 min manatı isə Azərbaycan muğamı haqqında iki cildliyin konsepsiyasının hazırlanmasına sərf olunacaq.
Fonddan bildiriblər ki, qaliblərin adları dekabrın 24-də elan olunacaq.
Elmin İnkişafı Fondu tərəfindən iyunun 30-da elan edilən birinci müsabiqə üçün elmi-tədqiqat proqramlarının, layihələrin və digər elmi fəaliyyətlərin maliyyələşdirilməsi üçün 6,1 milyon manat vəsait ayrılmışdı.