Azərbaycan, Bakı, 20 iyun /Trend, müxbir K.Zərbalıyeva/
Gəncədə alüminium zavodunda insan ölümü ilə nəticələnən uçqunla bağlı cinayət işi başlanıb.
Trend-in Baş Prokurorluğun rəsmi internet saytına istinadən verdiyi məlumata görə, iyunun 17-də saat 17:00 radələrində Gəncə şəhərində fəaliyyət göstərən "Detal Alüminium" Məhdud Məsuliyyətli Cəmiyyətin ərazisində söküntü işləri aparılarkən 66 metr uzunluğunda dəmir-beton konstruksiyalı tavan çöküb.
Nəticədə fəhlələr - 1975-ci il təvəlldüdlü Feyzullayev Vyaçeslav Mahmud oğlu və 1977-ci il təvəllüdlü Seyfullayev Səlim Səttar oğlu uçqun altında qalaraq aldıqları xəsarətlərdən hadisə yerində ölüblər.
Şəhər prokurorluğunun əməkdaşları tərəfindən hadisə yeri və meyitlərə məhkəmə-tibbi ekspertin iştirakı ilə baxış keçirilib və fakta görə Cinayət Məcəlləsinin 162.2-ci (əmək mühafizəsi qaydalarını pozma) maddəsi ilə cinayət işi başlanaraq iş üzrə məhkəmə-tibb ekspertizaları təyin olunub, şahidlər dindirilib və digər zəruri istintaq hərəkətləri aparılıb.
Hazırda iş üzrə istintaq davam etdirilir.