Azərbaycan, Bakı, 6 sentyabr /Trend, müxbir M.Əliyev/
Salyan rayonunun Çuxanlı kəndi ərazisində Kür çayı üzərində yeni körpünün tikintisi üzrə layihə çərçivəsində tikinti işlərinin 48 faizi yerinə yetirilib.
"Azəryolservis" ASC-dən Trend-ə verilən məlumata görə, layihənin 2013-cü ilin iyul ayının sonunda başa çatdırılması planlaşdırılır.
Ələt-Astara avtomobil yolunun 54+410-cu km-dən başlayan körpünün tikintisi 55+800-cü km-də başa çatacaq. 2 gediş-2 gəliş üçün nəzərdə tutulan körpünün ümumi uzunluğu 362.92 metr, yanaşma yolları 1037.08 metr, qabariti isə 24.5 metr təşkil edəcək.
6 dayaqlı körpünün aşırımlarından 4-ü kəsilməz tir sistemli, 1-i isə kəsilən tağıvari fermalı, sonradan gərginləşdirilmiş dəmir-beton tirlərdən ibarət olacaq.
Artıq layihə üzrə bütün dayaqlarla yanaşı, 3 ədəd dairəvi, 1 ədəd düzbucaqlı boru, 1 ədəd heyvan keçidi və eni 9 metr, hündürlüyü 5 metr olan tunelin tikintisi başa çatdırılıb.
Hazırda uzunluğu 151.08 metr olan ən böyük aşırım qurğusunda estakadalar qurulub, digərlərinin isə tikintisinə hazırlıq gedir.