Azərbaycan, Bakı, 22 aprel / Trend, müxbir M.Əliyev/
Macarıstanın Milli Tələbə Birliyinin (HÖOK) dəvəti ilə 23-29 aprel tarixlərində Azərbaycan Tələbə Gənclər Təşkilatları İttifaqının (ATGTİ) nümayəndələri Avropa Tələbələr Birliyinin (ATB) idarə heyətinin 64-cü iclasına qatılacaqlar.
Trend-in məlumatına görə, bu barədə ATGTİ-nin mətbuat xidmətindən bildirilib.
İclasda ATB-nin fəaliyyət istiqamətləri, gələcək layihələri və yeni tələbə QHT-lərinin ATB-yə üzvlüyü müzakirə olunacaq.
Qeyd edək ki, Budapeştdə ATB-nin 67-ci iclasının 2014-cü ilin noyabrında Bakıda keçirilməsi məsələsi də müzakirəyə çıxarılacaq. ATGTİ-nin rəsmiləri bu məqsədlə avropalı həmkarları üçün Azərbaycanın geniş təqdimatını keçirərək, iclasın məhz Bakıda keçirilməsinin prioritetlərini vurğulayacaqlar.
Xatırladırıq ki, ATGTİ ATB-nin tamhüquqlu üzvüdür.