Azərbaycan, Bakı, 30 sentyabr/Trend, müxbir A. Tağıyeva/
TRT telekanalının baş direktoru İbrahim Şahin "Odlar Yurdu" Universitetinin fəxri doktoru adına layiq görülüb.
Trend-in məlumatına görə, bu münasibətlə Bakıda çıxış edən İ. Şahin qeyd edib ki, bu onun üçün çox vacib hadisədir: "Bu, beynəlxalq səviyyədə layiq görüldüyüm ilk addır".
İ. Şahin bildirib ki, TRT telekanalı Azərbaycanın həqiqətlərini həmişə türkiyəli tamaşaçılara çatdırmağa çalışıb: "TRT fəaliyyəti dövründə Azərbaycan barəsində 13 mindən artıq proqram və xəbər hazırlayıb".
Onun sözlərinə görə, Azərbaycan və Türkiyə dünyanın bir çox ölkələri üçün nümunədir: "Belə ki, Türkiyə 2023-cü ildə dünyanın 10 ən iri iqtisadiyyatına daxil olmaq niyyətindədir".
Baş direktor vurğulayıb ki, Azərbaycanda iqtisadiyyatın möhkəmləndirilməsi demokratiyanın gücləndirilməsi ilə paralel aparılır: "Ölkədə keçiriləcək prezident seçkiləri bunun sübutu olacaq".