...

“Azərxalça” ilə ABŞ-Azərbaycan Ticarət Palatası arasında niyyət protokolu imzalanıb (FOTO)

Cəmiyyət Materials 26 Noyabr 2019 18:50 (UTC +04:00)
“Azərxalça” Açıq Səhmdar Cəmiyyəti ilə Amerika Birləşmiş Ştatları-Azərbaycan Ticarət Palatası arasında niyyət protokolu imzalanıb.
“Azərxalça” ilə ABŞ-Azərbaycan Ticarət Palatası arasında niyyət protokolu imzalanıb (FOTO)

Bakı. Trend:

“Azərxalça” Açıq Səhmdar Cəmiyyəti ilə Amerika Birləşmiş Ştatları-Azərbaycan Ticarət Palatası arasında niyyət protokolu imzalanıb.

Qurumdan Trend-ə verilən məlumata görə, bu protokola uyğun olaraq, Amerika Birləşmiş Ştatlarında Azərbaycan xalçalarına həsr edilmiş tədbirlər keçiriləcək.

Niyyət protokolunun imzalanmasından öncə “Azərxalça” Açıq Səhmdar Cəmiyyəti İdarə Heyətinin sədri Vidadi Muradov ABŞ-Azərbaycan Ticarət Palatasının həmsədri Reza Vəziri ilə görüşüb.

Qonağı səmimiyyətlə salamlayan Vidadi Muradov son illər Azərbaycanda xalça sənətinin inkişafı istiqamətində görülən işlər barədə məlumat verib. Qeyd olunub ki, Azərbaycan Respublikasının Prezidenti cənab İlham Əliyevin 2016-cı il 5 may tarixli Sərəncamı ilə yaradılan “Azərxalça” Açıq Səhmdar Cəmiyyətinin 2016-2019-cu illərdə 21 xalça fabriki fəaliyyətə başlayıb. Bu fabriklərdə indiyədək 13 min kvadratmetrdən çox məhsul istehsal olunub. İndi qarşımızda duran əsas vəzifə Azərbaycan xalçalarının bütün dünyada təbliğinə, “Azərxalça”nın məhsullarının beynəlxalq xalça bazarında satışının genişləndirilməsinə nail olmaqdır.

Bildirilib ki, Azərbaycan xalçası tarixən dünya bazarında brend məhsul kimi satılıb. Bu gün dünyanın bir çox nüfuzlu muzeylərində və şəxsi qalereyalarında saxlanılan Azərbaycan xalçaları onların tarixən brend məhsullar kimi alındığını və çox dəyərli olduğunu sübuta yetirir. Nadir Azərbaycan xalçalarının saxlanıldığı mədəniyyət ocaqlarından biri də ABŞ-da fəaliyyət göstərən “Metropoliten” Muzeyidir. Həmin muzeydə 45 xovlu və xovsuz Azərbaycan xalçası, namazlıqlar nümayiş etdirilir. Bu xalçalar Bakı, İrəvan, Naxçıvan, Qarabağ, Qazax-Borçalı, Quba, Şirvan və Təbriz qruplarına aid qiymətli sənət əsərləridir. “Metropoliten” Muzeyində sərgilənən ən qədim Azərbaycan xalçaları 17-ci əsrdə toxunub. Bütün bunlar onu deməyə əsas verir ki, ABŞ-da Azərbaycan xalçalarına həmişə ciddi maraq göstərilib.

Vurğulanıb ki, son illər milli naxışlarla toxunan xalçaların şöhrətini özünə qaytarmaq üçün dövlətimizin diqqət və qayğısı sayəsində mühüm tədbirlər həyata keçirilib. Bu istiqamətdə görülən işlər uğurla davam etdirilir. “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”nda da xalçalarımızın ölkə brendi olaraq dünya bazarına ixrac olunması qarşıya qoyulan əsas vəzifələrdən biridir. Artıq “Azərbaycan xalçası” brendi yaradılıb.

Vidadi Muradov deyib ki, ölkə Prezidentinin tapşırıqlarına uyğun olaraq, “Azərxalça” Açıq Səhmdar Cəmiyyəti Azərbaycan xalçasının dünya bazarında öz yerini tuta bilməsi və möhkəmlənməsi üçün müvafiq tədbirlər həyata keçirir. ABŞ-Azərbaycan Ticarət Palatası ilə qarşlıqlı əməkdaşlıq haqqında niyyət protokolunun imzalanması da bu tədbirlərin davamıdır. Məqsəd ABŞ-da Azərbaycan xalçalarının təbliğ edilməsi, “Azərxalça”nın məhsullarının satış imkanlarının genişləndirilməsidir.
Qeyd olunub ki, “Azərxalça” əl ilə toxunmuş xalça və xalça məmulatlarını Ticarət Palatası üçün təchiz edəcək. Ticarət Palatası isə xalçaları özünün Vaşinqtonda yerləşən iqamətgahında və digər məkanlarda təşkil ediləcək tədbirlərdə nümayiş etdirəcək, habelə “Azərxalça”nın verdiyi məlumatları bu sahə ilə məşğul olan sahibkarlara və fiziki şəxslərə çatdıracaqdır. Tərəflər Azərbaycanın xalça toxuma ənənələrini, onun tarixini, toxucuları və xalçaları Amerika Birləşmiş Ştatlarında birlikdə təbliğ etmək niyyətindədirlər.

Bu niyyət protokolunun müddəti 1 ildir. İlkin mərhələdə “Azərxalça” tərəfindən ABŞ-a 55 ədəd xalça göndərilib. Həmin xalçaların Nyu-York və Vaşinqton şəhərlərində sərgisi, müxtəlif tədblər təşkil ediləcəkdir. İlk tədbir dekabrın 2-də ABŞ-Azərbaycan Ticarət Palatasının Vaşinqtonda yerləşən əsas binasında keçiriləcək.

Vidadi Muradov Azərbaycan xalçalarının Amerika Birləşmiş Ştatlarında təbliğinə göstərdiyi köməyə görə, ABŞ-Azərbaycan Ticarət Palatasının rəhbərliyinə, xüsusən Ticarət Palatasının həmsədri Reza Vəziriyə öz təşəkkürünü bildirib.

Ticarət Palatasının fəaliyyəti barədə ətraflı məlumat verən Reza Vəziri niyyət protokolunda nəzərdə tutulan tədbirlərin həyata keçirilməsi üçün əllərindən gələni əsirgəməyəcəklərini bildirib.

Sonra “Azərxalça” Açıq Səhmdar Cəmiyyəti ilə ABŞ-Azərbaycan Ticarət Palatası arasında niyyət protokolu imzalanıb. Niyyət protokolunu “Azərxalça” ASC İdarə Heyətinin sədri Vidadi Muradov və ABŞ-Azərbaycan Ticarət Palatasının həmsədri Reza Vəziri imzalayıblar. Sonda mətbuat konfransı keçirilib, jurnalistlərin sualları cavablandırılıb.

Məqalədə:
Xəbər lenti

Xəbər lenti