Bakı. Trend:
Bakı Ağır Cinayətlər Məhkəməsində külli miqdarda dələduzluqda təqsirləndirilən Bakı Slavyan Universitetinin (BSU) sabiq şöbə müdiri Dürdanə Əliyevanın cinayət işi üzrə məhkəmə prosesi davam etdirilib.
Trend-in məlumatına görə, hakim Əli Məmmədovun sədrliyi ilə keçirilən prosesdə məhkəməyə məcburi gətirilən BSU-nun sabiq rektoru Nurlana Əliyeva ifadə verib.
O bildirib ki, rektor olduğu vaxtda universitetin səfirlikərlə
güclü əlaqələri olub:
"Təmir zamanı universitetin muzeyi quruldu. Kembric və Oksford
universitetləri ilə əlaqələr qurulub. 1 kompüteri olmayan
universitetdə mənim dövrümdə bütün auditoriyalar kompüterlə təmin
olundu. Mən haqqımda səsləndirilən ittihamlarla razı deyiləm. Mən
heç vaxt universitetin büdcəsinə əl atmamışam. Mən Dürdanə
Əliyevanı tanımıram. Ödənişli əsaslarla təhsil alan bütün tələbələr
təhsil haqqını verirdilər. Təhsil haqqı bir başa sistemə
oturdulurdu. Nağd şəklində dekana pulun ödənilməsi faktı ilə qəti
razı deyiləm. Pandemiya dövründə ödəmələr azaldı, çünki tələbələr
onlayn şəkildə təhsil alırdılar. Mənim dövrümdə tələbə qəbulu
artmağa başlayıb. Ola bilməz ki, bizdə tələbə təhsil haqqını
ödəməməyə görə universitetdən qovulsun. Tələbələrin təhsil
haqlarını ödəyib-ödəməməsi ilə bağlı məlumatı dekan və mühasibatlıq
şöbəsi bilirdi. Məhz mənim dövrümdə pandemiya səbəbindən 826 tələbə
dövlət imtahanından, təcrübə qiymətlərindən azad olundu. 5 tələbə
akademik azad olundu. Dürdanə Əliyeva ilə aramda hər hansı bir pul
razılaşması olmayıb. Mən universitetdən çıxana qədər 5 min tələbə
təhsil alırdı. 200-ə qədər isə əlavə qiyabi təhsil alan tələbə var
idi".
Təqsirləndirilən şəxsin vəkili isə bildirib ki, iş üzrə 123 tələbə 226 min 960 manat mülki iddia qaldırıb: "123 tələbədən 95-i məhkəmədə ifadə verərək bildirib ki, universitetin daxilində olan ödəmə terminalı işləmirdi. Bu səbəbdən onlar ödənişləri bir çox hallarda dekanlığa yaxınlaşıb nağd şəkildə ödəyirdilər.
Məhkəmənin növbəti iclası aprelin 10-na təyin edilib.
Qeyd edək ki, Baş Prokuror yanında Korrupsiyaya qarşı Mübarizə Baş İdarəsində Bakı Slavyan Universitetinin (BSU) əlavə və qiyabi təhsil şöbəsinin müdiri, dosent Dürdanə Əliyeva barəsində araşdırma aparılıb.
Dürdanə Əliyevanın qanunsuz əməlləri törətməsi barədə çoxsaylı şikayətlər araşdırılıb.
Onun barəsində Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə), 32.4, 312.2 (rüşvət verməyə təhrik etmə), 311.1 (rüşvət alma) maddələri ilə cinayət işi başlanılıb.