Bakı. Trend:
Azərbaycan milli mətbuatının 150 illiyi ilə əlaqədar Azərbaycan Respublikasının yubiley medalı təsis ediləcək.
Trend xəbər verir ki, bununla bağlı məsələ Milli Məclisin 2025-ci il yaz sessiyasının bu gün keçirilən ilk plenar iclasında müzakirə edilən “Azərbaycan Respublikasının orden və medallarının təsis edilməsi haqqında” Qanuna təklif olunan dəyişiklikdə öz əksini tapıb.
Qanuna edilən dəyişikliklə “Azərbaycan milli mətbuatının 150 illiyi (1875-2025)” Azərbaycan Respublikasının yubiley medalı haqqında Əsasnamə” də təsdiqlənəcək.
Əsasnamədə bildirilib ki, “Azərbaycan milli mətbuatının 150 illiyi (1875-2025)” Azərbaycan Respublikasının yubiley medalı ilə media sahəsinin inkişafında xüsusi xidmətləri olan, bu sahədə səmərəli fəaliyyət göstərən və ya media ilə əməkdaşlıqda fərqlənən Azərbaycan vətəndaşları, əcnəbilər və vətəndaşlığı olmayan şəxslər təltif ediləcəklər.
Qanun layihəsi bir oxunuşda qəbul olunub.
