Bakı. Trend:
2026/2027-ci tədris ili üçün ali təhsil müəssisələrinin bakalavriat səviyyəsinə və tam orta (11 illik) təhsil bazasında orta ixtisas təhsili müəssisələrinə tələbə qəbulu üçün indiyə qədər 68978 nəfər qeydiyyatdan keçib.
Trend Dövlət İmtahan Mərkəzinin statistikasına istinadən xəbər verir ki, hazırda universitetlərə qəbul üçün Azərbaycan bölməsi üzrə 61228 nəfər, rus bölməsi üzrə 7750 nəfər qeydiyyatdan keçib.
Kollec (11 illik) üçün isə qeydiyyatdan keçənlərin sayı 61474 nəfərdir. Onların 55493-ü Azərbaycan bölməsi, 5981 nəfəri isə rus bölməsi üzrə qeydiyyatdan keçib.
2025-ci il buraxılış və ya test imtahanlarının I mərhələsinin nəticəsi əsasında müsabiqəyə qoşulan abituriyent sayı isə hələki 1320 nəfərdir.
Qeyd edək ki, III ixtisas qrupu üzrə dil-tarix (DT) altqrupuna daxil olan ixtisasların müsabiqəsi ilə yanaşı, tarixcoğrafiya (TC) altqrupuna daxil olan ixtisasların müsabiqəsində də iştirak etmək istəyən abituriyentlər ödəniş etməklə əlavə olaraq coğrafiya fənnindən imtahan verməlidirlər.
Xatırladaq ki, ali təhsil müəssisələrinə, həmçinin 9 və 11 illik təhsil bazasında kolleclərə sənəd qəbuluna dünən başlanıb və martın 5-dək davam edəcək.