BQXK-nin nümayəndələri azərbaycanlı əsirlə görüşüb
Azərbaycan, Bakı / Trend müxbir K. Zərbalıyeva/ Dünən Beynəlxalq Qırmızı Xaç Komitəsinin nümayəndələri ötən il dekabrın 24-də ermənilər tərəfindən əsir götürülmüş Azərbaycan Silahlı Qüvvələrinin əsgəri, kiçik çavuş Samir Məmmədovla görüşüb. Bu barədə Trend ə çərşənbə axşamı S.Məmmədovun əmisi Vidadi Məmmədov məlumat verib. O bildirib ki, BQXK-nin Bərdə rayonundakı nümayəndələri bu barədə əsirin ailəsinə məlumat verib.
BQXK-nin nümayəndələri S.Məmmədova ailəsinin növbəti məktubunu çatdırıb. V.Məmmədovun sözlərinə görə, beynəlxalq təşkilatın nümayəndələri Samirin səhhətinin yaxşı olduğunu bildirib. BQXK-nin nümayəndələri əsirdən ailəsinə məktub gətirməyib.
V.Məmmədovun sözlərinə görə, ailəsi Samirə 13 məktub göndərib, ondan isə 5 məktub alıblar.
Qazax rayonundakı N saylı hərbi hissənin əsgəri, Bərdə rayon hərbi komissarlığından hərbi xidmətə çağrılan S.Məmmədov hərbi hissədən 15 kilometr aralıda, Qazax-İcevan sərhəddində ermənilər tərəfindən əsir götürülüb.
