Azərbaycan, Bakı, 12 oktyabr /Trend/
Oktyabrın 11-də Gəncə və Naftalan şəhərləri, eləcə də Samux, Goranboy rayonlarının ərazisində Federasiya kuboku uğrunda çoxgünlü ötüşmələr üzrə velosiped yarışlarına start verilib. Bu barədə Trend-ə Azərbaycan Velosiped İdmanı Federasiyasından məlumat verilib.
Velosipedçilər dörd mərhələdə bütövlükdə 426 km məsafə qət edəcəklər.Yarışların 1-ci mərhələsində müxtəlif yaş qruplarından olan 50-dək idmançı fərdi və qrup şəklində mübarizəyə qoşulub.
Yarışlarda Gürcüstan velosipedçilərinin 12 nəfərdən ibarət komandası da iştirak edir.
Yarışların ilk mərhələsi Samux rayonu ərazisində başlayıb. U-15 yaş kateqoriyası üzrə ötüşmələrdə Maksim Natereskov birinci olub. Şamil Rəhimov ikinci, Nurlan Həsənov isə üçüncü yeri tutub. U-17/Gənclər yaş kateqoriyası üzrə ötüşmələrdə Elgün Əlizadə bütün rəqiblərini qabaqlayaraq finişə hamıdan tez çatıb. Xosiauri Dimitriy ikinci (Gürcüstan), Ruslan Həsənov isə üçüncü yerin sahibi olub. Elit/U-23 yaş qurupu üzrə Samir Cəbrayılov finişə hamıdan tez çataraq birinci yeri tutub. Gürcüstan təmsilçisi Georgi Nadiradze ikinci, Aqşin İsmayılov isə üçüncü olub.
Sabah yarışların ikinci mərhələsi keçiriləcək.