Güləşçilərimiz 2013-cü ili 298 medalla tamamlayıblar

Azərbaycan, Bakı, 28 dekabr /Trend/

Yola saldığımız 2013-cü il Azərbaycan Güləş Federasiyası üçün növbəti uğurlu illərdən biri olub. Yığma komandalarımız iştirak etdikləri beynəlxalq turnir və çempionatlarda yüksək nailiyyətlər əldə ediblər.

Azərbaycan Güləş Federasiyasının mətbuat xidmətindən Trend-ə verilən məlumata görə, yığma komandalarımızın üzvləri 2013-cü ildə iştirak etdikləri rəsmi beynəlxalq yarışlarda 17 qızıl, 15 gümüş, 38 bürünc - ümumilikdə 70 medal qazanıblar.

Bunların 27-si yeniyetmə güləşçilərin payına düşür. Yeniyetmə güləşçilərimiz Avropa və dünya çempionatlarında 10 qızıl, 4 gümüş, 13 bürünc medala sahib olublar.

Gənc güləşçilərimizin də rəsmi yarışlarda iştirakı onların uğurlu çıxışı ilə yadda qalıb. Belə ki, gənclərimiz Avropa və dünya çempionatında 5 qızıl, 5 gümüş, 14 bürünc medal qazanmaqla ötən ildəki uğurlu nəticələrini davam etdiriblər.

Böyüklərdən ibarət yığma komandalarımız isə, 2-si qızıl, 6-sı gümüş, 11-i bürünc olmaqla 19 medal qazanıb.

Bundan başqa, yığma komandalarımız artıq ənənəyə çevrilən ümummilli lider Heydər Əliyevin xatirəsinə həsr olunmuş güləş üzrə Qızıl Qran Pri beynəlxalq turnirinin final mərhələsi də daxil olmaqla iştirak etdikləri digər beynəlxalq turnirlərdə 228 medal qazanıb. Bu medalların 75-sinin əyarı qızıl, 56-sı gümüş və 97-nin əyarı isə bürünc olub.

Qarşıdan gələn 2014-cü il güləşçilər üçün böyük əhəmiyyət kəsb edən çox məsuliyyətli bir təqvim ilidir. Güləş qaydalarında və çəki dərəcələrində edilən son dəyişikliklərə uyğun hazırlaşmaq və qazanılan nailiyyətləri daha da artırmaq bütün növ güləş komandalarımızın qarşısındakı ən əsas məqsəddir.

Azərbaycan güləşçilərinin 2013-cü il ərzində beynəlxalq turnirlərdə əldə etdiyi nəticələr: