Azərbaycan, Bakı, 1 iyun /Trend/
Azərbaycan Avtomobil Federasiyasının nümayəndə heyəti 2016-cı ildə Bakıda keçiriləcək "Formula-1" Qran-Prisinə hazırlıq çərçivəsində Monako knyazlığına səfər edib.
Federasiyadan Trend-ə verilən məlumata görə, Azərbaycan Avtomobil Federasiyasının prezidenti Anar Ələkbərov Bakıda keçiriləcək "Formula-1" yarışına aid təşkilati məsələlərin həlli ilə yanaşı, Beynəlxalq Avtomobil Federasiyası ilə bu istiqamətdə işlərin koordinasiyası, həmçinin tarixən keçirilən Monako Qran-Prisi təcrübəsinin öyrənilməsi üzrə danışıqlar aparıb.
Qeyd edilib ki, Monako Qran-Prisi də Bakıda planlaşdırıldığı kimi şəhəriçi ərazidə keçirildiyindən, əsas təşkilati işlərin öyrənilməsi baxımından əhəmiyyətlidir.
Səfər çərçivəsində, həmçinin Beynəlxalq Avtomobil Federasiyasının prezidenti Jan Tod (Jean Todt) ilə görüş keçirilib. Görüşdə "Formula-1" yarışına hazırlıq, Azərbaycanda avtomobil idmanının inkişafı, yol təhlükəsizliyinin təbliği və digər məsələlər müzakirə edilib.