Bakı. Trend:
Futbol üzrə Portuqaliya millisinin yeni baş məşqçisi məlum olub.
Portuqaliya Futbol Federasiyasının rəsmi saytı xəbər verir ki, bu vəzifəyə Jorje Jezuş gətirilib. 71 yaşlı portuqaliyalı mütəxəssis komandanın sükanı arxasında Roberto Martinesi əvəzləyib.
O, 2030-cu ildə Portuqaliya, İspaniya və Mərakeşin birgə ev sahibliyi edəcəyi dünya çempionatının sonunadək milli komandaya rəhbərlik edəcək.
Portuqaliya Futbol Federasiyasının prezidenti Pedro Proensa mütəxəssisin seçilməsinə səbəb olan xüsusiyyətləri sadalayıb: "Biz yeni mərhələ üçün istədiklərimizi tam əks etdirən bir baş məşqçi seçdik: liderlik, ambisiya və göstərdiyi nəticələr. O, tələbkar, hamının qəbul etdiyi, tariximizin ən yaxşı məşqçilərindən biri, hər zaman qələbə üçün oynamağa öyrəşmiş, özünəməxsus üsluba malik və baxışlarımızı bölüşən bir mütəxəssisdir".
Jorje Jezuş məşqçilik karyerası boyunca "Braqa", "Benfika", "Sportinq", "Əl-Hilal", "Flamenqo", "Fənərbağça", "Əl-Nəsr" kimi məşhur klublara rəhbərlik edib. Rəhbərlik etdiyi komandalarla Portuqaliya çempionatının, Portuqaliya kuboku və Liqa kubokunun, Səudiyyə Ərəbistanı çempionatının, Braziliya çempionatının, Libertadores kubokunun, Türkiyə kubokunun qalibi olub.
Xatırladaq ki, Portuqaliya millisi DÇ-2026-nın 1/8 finalında İspaniyaya 0:1 hesabı ilə uduzaraq mübarizəni dayandırıb. Həmin matçdan sonra Roberto Martines istefa verib.
