Bakı.Trend:
Azərbaycanda yanvar-iyun ayları üzrə ümumi daxili məhsulun (ÜDM) həcmi açıqlanıb.
Azərbaycan Dövlət Statistika Komitəsinin yaydığı "2026-cı ilin yanvar-iyun aylarında ölkənin sosial-iqtisadi inkişafının makroiqtisadi göstəriciləri" hesabatına əsasən, cari ilin yanvar-iyun aylarında ölkədə 65,207 milyard manat dəyərində ÜDM istehsal olunub. Bu göstərici 2025-ci ilin eyni dövrü ilə müqayisədə 0,8 faiz artıb.
Hesabat dövründə iqtisadiyyatın neft-qaz sektorunda yaradılmış əlavə dəyər 0,7 faiz azalaraq 19,610 milyard manat təşkil edib. Qeyri-neft-qaz sektorunda isə əlavə dəyər 1,5 faiz artaraq 45,596 milyard manata çatıb.
Niderlandın "ING Group" bank qrupunun yenilənmiş proqnozuna əsasən, 2026-cı ildə Azərbaycanda ÜDM-in illik artımı 2 faiz səviyyəsində gözlənilir.
Analitiklərin qiymətləndirmələrinə görə, 2027-ci il üzrə proqnoz dəyişməyərək 3 faiz səviyyəsində saxlanılıb, 2028-ci ildə isə ÜDM-in 2,3 faiz artacağı gözlənilir.
Rüblər üzrə 2026-cı il üçün aşağıdakı göstəricilər proqnozlaşdırılır: ikinci rübdə 2 faiz, üçüncü rübdə 3 faiz, dördüncü rübdə isə 3,3 faiz artım.
Proqnoza əsasən, 2027-ci ildə birinci rübdə ÜDM-in 3 faiz, ikinci rübdə 3,5 faiz, üçüncü rübdə 2 faiz, dördüncü rübdə isə 3,5 faiz artacağı gözlənilir. 2028-ci ildə isə ÜDM-in illik artımının 2,3 faiz təşkil edəcəyi proqnozlaşdırılır.
Qeyd edək ki, "Fitch Ratings" agentliyi də 2026-cı ildə Azərbaycan iqtisadiyyatının 2 faiz artacağını proqnozlaşdırır.
"2026-cı ildə iqtisadi artımın 2 faizə qədər mülayim sürətlənəcəyini gözləyirik. Belə ki, enerji daşıyıcılarının yüksək qiymətlərinin müsbət təsiri daha sərt fiskal və pul-kredit siyasəti, eləcə də kreditləşmənin mülayim artımı ilə tarazlaşdırılacaq", – deyə Fitch Ratings analitikləri bildiriblər.
Bununla yanaşı, "KPMG Azerbaijan" şirkətinin ekspertləri Trend-ə bildiriblər ki, mövcud şəraitdə "Fitch Ratings"in ÜDM-in 2 faiz artacağı ilə bağlı proqnozu həddindən artıq nikbin görünür.
"2026-cı ilin yanvar-aprel aylarında ÜDM ötən ilin eyni dövrü ilə müqayisədə cəmi 0,2 faiz artıb. Halbuki bir il əvvəl bu göstərici 0,9 faiz idi. Nəzərə alsaq ki, 2025-ci ilin yekunlarına görə iqtisadi artım 1,4 faiz təşkil edib, 2026-cı il üzrə 2 faizlik proqnoz tam real görünmür. İlin yekununda bu nəticəyə nail olmaq üçün may-dekabr aylarında iqtisadiyyatın təxminən 3 faiz səviyyəsində artım nümayiş etdirməsi tələb olunur ki, bu da artım tempinin əhəmiyyətli dərəcədə sürətlənməsini zəruri edir. Neft-qaz sektorunda azalma və investisiyaların geriləməsi fonunda belə bir sürətlənmənin baş vermə ehtimalı suallar doğurur. Bununla yanaşı, İqtisadiyyat Nazirliyinin məlumatına görə, hazırkı yavaşıma qismən bəzi dövlət layihələrinin icrasında yaranmış gecikmələrlə bağlıdır və yaxın aylarda həmin layihələrin aktivləşdirilməsi iqtisadi artıma dəstək verə bilər", – deyə "KPMG Azerbaijan"dan bildirilib.
