Bakı. Trend:
Türkiyənin Rusiyadan aldığı "S-400" zenit-raket komplekslərinin (ZRK) mümkün satışı məsələsi son dərəcə həssas mövzudur.
Bunu Kremlin rəsmi nümayəndəsi Dmitri Peskov Rusiya mediasına açıqlamasında deyib.
"Bu barədə yalnız onu deyə bilərəm ki, söhbət son dərəcə həssas mövzudan gedir", – deyə o bildirib.
Peskovun sözlərinə görə, Rusiya bu məsələ ilə bağlı Türkiyə tərəfi ilə təmaslar aparıb və həmin təmaslar davam etdiriləcək.
Bundan əvvəl məlum olub ki, Türkiyənin vaxtilə Rusiyadan aldığı “S-400” zenit-raket kompleksləri Fars körfəzi ölkələrindən birinə satılmış ola bilər. Mənbələrin məlumatına görə, mümkün alıcılar sırasında Birləşmiş Ərəb Əmirlikləri (BƏƏ) və Qətərin adı çəkilir.
