Bakı. Trend:
Tovuzun Əlibəyli kəndi ərazisində leysan yağışlarında qəzalı vəziyyətə düşən körpü bərpa edilib.
"Azəravtoyol" ASC-nin mətbuat xidmətindən Trend-ə verilən məlumata görə, körpü 17 km uzunluğunda olan Hacallı - Təpəbaşı avtomobil yolunun 5-ci km-də Tovuz çayı üzərində yerləşir. 2 aşırımlı dəmir-beton konstruksiyalı körpünün uzunluğu 27 metr, eni isə 7 metrdir.
Körpünün kənar dayaqları bərpa edilib, bünövrəsinə beton məhlul tökülərək bərkidilib, yeni su tənzimləyici qurğular inşa edilib. Körpünün yanaşma yollarında da bərpa işləri aparılıb, yeni asfalt-beton örtüyü döşənib.
Körpünün hərəkət hissəsi də əsaslı şəkildə bərpa olunaraq asfatlanıb, hər iki tərəfdə monolit betonla təkərqaytaranlar inşa edilib və yeni mühəccərlər quraşdırılıb.
Qeyd edək ki, bu ilin yaz-yay aylarındakı leysan yağışları nəticəsində Tovuz çayı üzərində yerləşən avtomobil körpüsünün dayaqları və su tənzimləyici qurğuları yuyularaq qəzalı vəziyyətə düşmüşdü.