Bakı. Trend:
Azərbaycan bankları “2023-2026-cı illər üçün Dayanıqlı Maliyyə üzrə Yol Xəritəsi” çərçivəsində bir sıra mühüm təşəbbüslər həyata keçirib.
Trend xəbər verir ki, bunu Azərbaycan Banklar Assosiasiyasının (ABA) prezidenti Zakir Nuriyev Azərbaycan Mərkəzi Bankının təşkil etdiyi “Qlobal maliyyə sistemi: iqlimlə mübarizə üçün maliyyələşdirmənin genişləndirilməsi” mövzusunda panel müzakirəsi zamanı deyib.
"Təşəbbüslərdən biri davamlı və yaşıl maliyyələşdirmə prinsiplərinin tətbiqidir. Banklar artıq davamlı və yaşıl maliyyə prinsiplərini öz strategiyalarına, idarəetmə çərçivələrinə, risklərin idarə edilməsi təcrübələrinə və açıqlama standartlarına inteqrasiya etməyə başlayıblar.
Bu tədbirlər Maliyyə Təşkilatları üçün Dayanıqlı Maliyyə Prinsipləri və Azərbaycan Mərkəzi Bankı tərəfindən dərc edilən iqlim risklərinin idarə edilməsi qaydalarına uyğundur. Digər bir təşəbbüs davamlı məhsul və xidmətlərə aiddir. Bundan əlavə, banklar rəqəmsal bankçılıq həlləri, yaşıl məhsullar və sosial məsuliyyət təşəbbüsləri daxil olmaqla davamlı məhsul və xidmətləri aktiv şəkildə inkişaf etdirir", - o bildirib.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.