Bakı. Trend:
COP29 beynəlxalq iqlim maliyyələşdirilməsinin genişləndirilməsi üçün aydın bir istiqamət müəyyən edəcək.
Trend xəbər verir ki, bunu Azərbaycan Respublikası Mərkəzi Bankının sədri Taleh Kazımov “Qlobal maliyyə sistemi: iqlim fəaliyyətinin maliyyələşdirilməsinin genişləndirilməsi” mövzusunda panel müzakirəsi zamanı bildirib.
“Gözəl Bakı şəhərimizdə COP29-a ev sahibliyi etmək bizim üçün böyük şərəfdir və bu, qlobal iqlim çağırışlarını qətiyyət, iddialı hədəflər və əməkdaşlıqla aradan qaldırmaq üçün səylərimizi birləşdirmək üçün əla bir imkandır.
COP29 bizə əldə olunan nəticələri qiymətləndirmək və bu istiqamətdə növbəti yolları araşdırmaq üçün vacib bir fürsət təqdim edir. Hamımız başa düşürük ki, iqlim dəyişikliyi sadəcə ekoloji böhran deyil. Bu, dərhal və kollektiv tədbirlər tələb edən son dərəcə mürəkkəb bir böhrandır.
Əminəm ki, COP29 beynəlxalq iqlim maliyyələşdirilməsinin genişləndirilməsi üçün aydın bir kurs müəyyən edəcək və xüsusilə inkişaf etməkdə olan ölkələr üçün maliyyələşmə çatışmazlığının aradan qaldırılmasına kömək edəcək”, – deyə o bildirib.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.