Bakı. Trend:
Maliyyə, İnvestisiya və Ticarət Günü çərçivəsində COP29-da Azərbaycan Mərkəzi Bankı tərəfindən "Dünyada dayanıqlı maliyyələşdirmənin təşviqi: dayanıqlı maliyyələşdirmə taksonomiyalarının uyğunluğu və müqayisəliliyi üzrə Yol Xəritəsi" mövzusunda panel müzakirə keçirilib.
Trend xəbər verir ki, Azərbaycan Mərkəzi Bankının sədri Taleh Kazımov dayanıqlı maliyyə taksonomiyalarının qarşılıqlı fəaliyyət və müqayisəliliyini təşviq etmək üçün yol xəritəsinin üç əsas elementini vurğulayıb.
"Yol Xəritəsi uyğunlaşma üçün mühüm əhəmiyyət kəsb edən üç əsas elementi vurğulayır: iqtisadi fəaliyyətlərin ümumi dəstinin müəyyən edilməsi - xüsusilə inkişaf etməkdə olan bazarlar və inkişaf etməkdə olan iqtisadiyyatlar üçün dekarbonizasiyaya xüsusi diqqət yetirməklə; G20 təlimatlarına uyğun olaraq taksonomiya və əsas meyarların prinsiplərinə uyğunlaşdırmaq üçün ümumi texniki yanaşmaların işlənib hazırlanması; taksonomiyalar vasitəsilə keçid maliyyəsinə ümumi yanaşmaları ifadə etmək. Xüsusilə yüksək emissiya sektorlarında keçid fəaliyyətlərini dəstəkləməklə “saf yaşıl” investisiyalardan kənara çıxmağın zəruriliyini qəbul edir", - o əlavə edib.
Bundan əlavə, o qeyd edib ki, yaşıl taksonomiya iqlim maliyyələşdirməsini genişləndirmək, kapitalı effektiv şəkildə səfərbər etmək və yaşıl iqtisadiyyata keçidi sürətləndirmək üçün daha böyük imkanlar açacaq.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
