Bakı.Trend:
Birləşmiş Millətlər Təşkilatı Baş Assambleyasının yüksəksəviyyəli həftəsi ərəfəsində Nyu-Yorkda BMT-nin mənzil-qərargahı ətrafında gücləndirilmiş təhlükəsizlik tədbirləri həyata keçirilir.
TASS-ın məlumatına görə, kompleksin ətrafındakı küçələr metal çəpərlərlə bağlanır, hüquq-mühafizə orqanlarının əməkdaşlarının sayı isə nəzərəçarpacaq dərəcədə artırılıb.
Yüksəksəviyyəli həftənin əsas hissəsinin başlamasına artıq bir gün qalmış kompleksin ətrafındakı ərazi qapalı zonanı xatırladır. Birinci avenyu və ona bitişik küçələrdə çoxsaylı metal maneələr quraşdırılıb, patrul avtomobilləri, təcili yardım xidmətlərinin bölmələri və polis əməkdaşları növbə çəkir, müvəqqəti buraxılış-nəzarət məntəqələri yaradılıb. Məlumata görə, girişlərin yaxınlığında mobil polis postları da qurulub, BMT-nin çəpərləri boyunca isə jurnalistlər birbaşa yayımlar üçün kameralar, işıqlandırma və digər avadanlıqlar quraşdırırlar.
Qeyd edək ki, BMT Baş Assambleyasının yüksəksəviyyəli həftəsi 21–26 sentyabr tarixlərində keçirilir.
