Bakı. Trend:
Azərbaycana uçuşlar həyata keçirən İran İslam Respublikasının aviaşirkətlərinin reysləri dayandırılır.
Bu barədə “Azərbaycan Hava Yolları” QSC-nin Mətbuat xidməti məlumat yayıb.
"AZAL ABŞ-nin İran İslam Respublikasına qarşı tətbiq etdiyi yeni sanksiya paketi, xüsusilə aviasiya sektoruna qarşı sanksiyalarla əlaqədar Azərbaycana uçuşlar həyata keçirən İran aviaşirkətlərinin reyslərinin 2026-cı il 22 sentyabr tarixindən etibarən dayandırılması barədə qərar qəbul etməli olmuşdur", - məlumatda qeyd edilib.
Qeyd edək ki, sentyabrın 8-də ABŞ-nin Xarici Aktivlərə Nəzarət İdarəsi (OFAC), İranın aviasiya sektoru ilə əlaqəli 36 quruma, o cümlədən 27 İran aviaşirkətinə qarşı sanksiyalar tətbiq edib. Sanksiyalar həmçinin İran aviaşirkətlərinə təyyarə, yükdaşıma və agentlik xidmətləri göstərən xarici şirkətlərə də şamil olunur. Bundan əlavə, OFAC aviasiya ilə bağlı üç lisenziyanın qüvvəsini dayandırıb. Bunlara ABŞ ərazisi üzərindən uçuşlara icazələr və qeyri-ABŞ aviaşirkətlərinin ABŞ-yə məxsus və ya ABŞ-nin nəzarətində olan təyyarələrdən istifadə etməklə İrana reyslər həyata keçirməsinə dair icazələr daxildir.
