Bakı. Trend:
Amerikalı yeniyetmə Din Roy ABŞ-də keçiriləcək aralıq seçkilərdə Vermont ştatının qubernatoru vəzifəsinə namizədliyini irəli sürüb. O, ABŞ-də mühüm siyasi vəzifəyə namizədliyini irəli sürən ən gənc şəxsdir. Seçiləcəyi təqdirdə, ABŞ-ın şimal-şərqində, Kanada ilə sərhəddə yerləşən Vermont ştatının icra hakimiyyətinə rəhbərlik edəcək. Vermont təxminən 645 min əhalisi ilə ölkənin əhalisi ən az olan ikinci ştatıdır.
Onun namizədliyini irəli sürməsi hüquqi boşluq sayəsində mümkün olub. Ştatların böyük əksəriyyətindən fərqli olaraq, Vermont Konstitusiyası qubernator olmaq üçün minimum yaş həddi müəyyən etmir. Din Roy da məhz bu hüquqi boşluqdan yararlanıb. O, apreldə “The Times” qəzetinə verdiyi müsahibədə bildirib: “Namizəd olmaq üçün minimum yaş həddini axtardım və Vermontda belə bir tələbin olmadığını aşkar etdim”.
Konstitusiyanın 23-cü bölməsinə əsasən, yalnız bir şərt tələb olunur: seçkidən əvvəlki dörd il ərzində ştatda yaşamış olmaq. Vermontun 5 mindən bir qədər çox əhalisi olan Stou şəhərindən olan bu gələcəyin siyasətçisi həmin şərtə cavab verir. Xizək sürmə, qaçış və Formula 1 kimi idman növlərinə maraq göstərən yeniyetmənin artıq bir neçə iş təcrübəsi də var. O, ailəsinə məxsus pizzaxanada işləyib, həmçinin parlamentdə təcrübəçi kimi fəaliyyət göstərib.
Namizədliyini irəli sürməklə yanaşı, yeniyetmə öz siyasi strukturunu – Azadlıq və Birlik Partiyasını da yaradıb. Bununla o, demokratlar və respublikaçılar üçün məcburi olan ilkin seçkidən yayınmağa çalışır. “Bunun çılğın səsləndiyini bilirəm – 15 yaşlı bir gəncin qubernator vəzifəsinə namizəd olması. Amma səmimi desəm, hazırda hakimiyyətdə olanlara baxın. Onlar bunu həmişə ediblər və heç nə işləmir”, – deyə o vurğulayıb. Qətiyyətli olan Din Roy seçki bülletenlərində adının yer alması üçün lazım olan 500 imzanı toplamaq məqsədilə qapı-qapı gəzib.
15 yaşında olan Stou sakininin artıq seçki proqramı ilə bağlı çoxsaylı ideyaları var. O, kütləvi müşahidənin qadağan edilməsini istəyir, ştatının enerji müstəqilliyini gücləndirmək üçün yeni atom elektrik stansiyalarının tikintisini təklif edir və mənzil məsələsini əsas prioritetlərindən biri hesab edir.
Belə ki, o, iri daşınmaz əmlak layihələrini ekoloji icazə sistemi vasitəsilə tənzimləyən və ştatda tikinti prosesini ləngitməkdə ittiham olunan 250-ci Aktın əleyhinədir. Namizəd deyir: “Seçiləcəyim təqdirdə, daha əlçatan mənzillərin tikintisini təşviq etmək üçün Vermontda mənzillərlə bağlı bir sıra qaydaları nəzərdə tutan 250-ci Aktı ləğv edəcəyəm. Həmçinin ştatda Airbnb vasitəsilə kirayəyə verilən mənzillərin sayına məhdudiyyət qoyulmasını və qısamüddətli kirayələrə tətbiq olunan vergilərin artırılmasını dəstəkləyəcəyəm”.
Yeniyetmə, həmçinin İlon Mask kimi bəzi milyarderlərin sərvətlərinin həddindən artıq cəmləşməsindən narazılığını ifadə edir. Din Royun fikrincə, “hazırda bir nəfərin sərvəti əksər ölkələrin bir neçə nəsil ərzində heç vaxt əldə edə bilməyəcəyi qədər böyükdür. (...) Sizin qubernatorunuz kimi Vermontda heç kimin bir milyard dollardan artıq xalis sərvətə sahib olmasına imkan verməyəcəyəm. Bu məbləği aşan bütün vəsait ehtiyacı olan insanlara kömək etmək üçün birbaşa hökumətə yönəldiləcək”.
