Azərbaycan, Bakı / Trend , müxbir İ.Xəlilova / Azərbaycanın Maliyyə Nazirliyi xarici valyutada nominallaşdırılmış dövlət istiqrazlarının buraxılması və onların maliyyə bazarlarında yerləşdirilməsi ilə bağlı hazırlıq işlərini başa çatdırıb. Bu barədə cümə axşamı Azərbaycanın Maliyyə naziri Samir Şərifov məlumat verib.
"Avrobondların yerləşdirilməsi məqsədilə biz maliyyə spredi üçün əlverişli şərait yaratmalıyıq" - deyə nazir bildirib. Dünyanın maliyyə bazarlarında, ilk növbədə, ABŞ-da superriskli ipoteka kreditinin böhranı davam etməkdədir ki, bu da bir çox inkişaf etmiş ölkələrin maliyyə sisteminə mənfi təsir göstərir. Bu vəziyyətdə inkişaf etmiş ölkələrin suveren borcu üzrə spred xeyli genişlənib.
Bununla əlaqədar olaraq, Maliyyə Nazirliyi bazarlara çıxış zamanı Azərbaycan üçün sərfəli olan faizlərlə vəsait cəlb etmək üçün vəziyyəti diqqətlə izləmək niyyətindədir. "Lakin hazırda, təəssüf ki, vəziyyət bunu etməyə imkan vermir. Bizim bir sıra ölkələr kimi , bazarlara çıxış əldə etmək, vəsait cəlb etmək və hərhansı maliyyə problemlərini həll etmək kimi fiskal məqsədlərimiz yoxdur, biz bu prosesi maliyyə bazarlarında şəraitin yaxşılaşacağı dövrə qədər təxirə sala bilərik" - deyə nazir bildirib. Əvvəllər avrobondların birinci emissiyasının tarixi 2007-ci ilin sentyabr-oktyabr aylarına təyin olunub.
Şərifovun sözlərinə görə, avroistiqrazları 5 illik bir müddət üçün buraxmaq planlaşdırılır, lakin o, digər şərtlər barədə danışmaqdan imtina edib. Bununla yanaşı , nazir, buraxılışın dəyərinin 500 mln. dollara qədər artacağını istisna etməyib.
Avrobondların birinci emissiyası üzrə hökumətin menecerləri qismində "Deutsche Bank AG London" və "Citigroup Global Markets Limited" investisiya bankları seçilib.
