Azərbaycan, Bakı / Trend , müxbir İ.Xəlilova / Azərbaycan Respublikası Dövlət Neft Şirkətindən verilən məlumatda bildirilir ki, şirkət maddi və qeyri-madddi aktivlərinin 2007-ci il iyulun 1-nə olan vəziyyətinin qiymətləndirilməsi üçün tender vasitəsilə məsləhətçi cəlb edir və şirkət onun vasitəsilə yaxın zamanda müqavilə imzalamağa hazırlaşır. Bu prosedur ARDNŞ-nin maliyyə hesabatının beynəlxalq standartlarına keçid prosedurlarına uyğun aparılır.
"Görülən işlərin səmərəliliyi əminlik yaradır ki, ARDNŞ-nin, onun strukturuna daxil olan ictimai əhəmiyyətli qurumların, eləcə də ,şirkətin tabeçiliyində olan hüquqi şəxs statuslu kommersiya təşkilatlarının 01 yanvar 2008-ci il tarixdən tam olaraq MHBS-na keçirilməsi təmin olunacaqdır" - deyə şirkətdən bildiriblər.
Müvafiq prosesdə ARDNŞ-ə konsaltinq xidmətlərini "PricewaterhouseCoopers" auditor şirkəti göstərir.
MHBS-yə keçidlə bağlı "tətbiq planı"nın hazırlanması üçün həm kommersiya, həm də texnoloji uyğunluğun təmin edilməsi baxımından imzalanmış müqavilə çərçivəsində, artıq işlər təhvil verilib. Bundan əlavə, MHBS-yə tam keçilməsi üçün nəzərdə tutulmuş növbəti mərhələ üzrə məsləhət xidmətlərinin və informasiya texnologiyalarının, müvafiq proqram təminatlarının hazırlanması və tətbiqi istiqamətində tələb olunan metodologiyanın işlənilməsi, təlim kurslarının keçirilməsi, biznes proseslərinin planlaşdırılması, 2007-ci il üzrə MHBS-yə uyğun konsolidasiya edilmiş maliyyə hesabatlarının hazırlanması, eləcə də, ERP sisteminin tətbiqi prosesinə dəstək kimi mühüm işlərin görülməsinə başlanıb.
Pricewaterhouse Coopers" şirkəti, həmçinin, 60 əməkdaş üçün MHBS-nın öyrədilməsi üzrə tryninq keçirmişdir. Eyni zamanda, hazırlanacaq informasiya texnologiyalarının müvafiq proqram təminatlarının işlənilməsi və tətbiqi üzrə ARDNŞ-nin İnformasiya Texnologiyaları və Rabitə İdarəsinin işçiləri üçün də ayrıca kurslar keçirilib.
Neft şirkətinin MHBS-yə keçidi şirkətin hər il beynəxalq audit keçməsi demək deyil. ARDNŞ-də buna ehtiyac görmürlər. Lakin əvvəllər beynəlxalq maliyyə təşkilatları ARDNŞ-nin maliyyə-təsərrüfat fəaliyyətinin məşhur auditor şirkətləri tərəfindən qiymətləndirilməsində təkid edirdilər. İndi isə bu təşkilatlar artıq bu tələblə çıxış etmirlər. Xüsusilə, belə bir tələb AYİB tərəfindən "Şah- dəniz" yatağının işlənməsi zamanı irəli sürülüb. ARDNŞ şirkətin marketinq və iqtisadi əməliyyatlar idarəsi tərəfindən hər il aparılan beynəlxalq auditi kifayət olduğunu hesab edir. ARDNŞ-nin müəssisələri, həmçinin, beynəlxalq auditorları da cəlb edə bilərlər.
