Azərbaycan, Şəki / Trend , müxbir E.Quliyev/ "Azərbaycanda ipəkçiliyin inkişafı ilə əlaqədar konsepsiya qəbul ediləcək". Bunu cümə axşamı "Şəki-İpək" ASC-nin texniki direktoru Şahin Əzizov bildirib.
Onun sözlərinə görə, 1500-dən artıq işçinin çalışdığı "Şəki-İpək" ASC Azərbaycanda ipəkçiliyin inkişafı ilə əlaqədar konsepsiya hazırlayıb və Nazirlər Kabinətinə təqdim edib.
Yerli xammal bazarının inkişafı üçün Çindən 4000 qutu ipəkqurdu toxumu gətirilib və 13 rayonun kumdarlarına paylanılıb. Çindən 50 kq tut toxumu da gətirilib və əkilib.
Əzizovun sözlərinə görə, yerli xammalın azlığından əziyyət çəən "Şəki-İpək" ASC bu məqsədlə Özbəkistan və İrandan 250 ton barama alıb.
"Şəki-İpək" ASC-də 2007-2008-ci illər üçün 4,5 milyondan artıq tut tingisi yetişdirilməsi proqnozlaşdırılıb. Tingilərin 3 milyonu ipəkçiliklə məşğul olan fərdi təsərrüfatlara pulsuz paylanılacaq.
Texniki direktor pambıq əyirmək məqsədilə İsveçdən 4 milyon avro dəyərində avadanlığın gətirildiyini və bunun da şirkətdə sap istehsalına imkan verəcəyini vurğulayıb.
Şəki paytaxt Bakıdan 352 kilometr şimal-qərbdə yerləşir.
