Azərbaycan, Bakı, 11 yanvar/ Trend , müxbir İ.Xəlilova, A.Bədəlova/ Azərbaycan hökumətində "Xüsusi iqtisadi zonalar haqqında" Qanun layihəsi üzrə müzakirələr başa çatıb. Bundan sonra o, Prezident Administrasiyasına təqdim ediləcək. Bu barədə cümə günü iqtisadi inkişaf nazirinin müavini Niyazi Səfərov məlumat verib.
Qanun layihəsində istehsalat, infrastruktur, innovasiya, qarışıq, azad ticarət zonalarının yaradılması nəzərdə tutulub. Sistemin çevikliyi üçün sənəddə digər XİZ-in yaradılmasının mümkünlüyü göstərilib. Ələtdə yeni beynəlxalq ticarət limanının tikintisi XİZ infrastrukturlarına aid edilir.
Azərbaycanda xüsusi iqtisadi zonaların yaradılması minimum 20-25 ilə nəzərdə tutulub. Hər bir iqtisadi zonanın fəaliyyət müddəti ayrı-ayrı qəbul ediləcək əsasnamədə yazılacaq.
XİZ-in fəaliyyət müddətinin müəyyən edilməsi Azərbaycan hökumətinin Avropa İttifaqına inteqrasiya planları ilə əlaqədardır. Belə ki, Aİ hazırki dövlət-üzvləri üçün son müddət kimi 2017-ci ili təyin edib. Bu, Polşanın Aİ-yə daxil olması ilə əlaqədar olub. Avropa xüsusi iqtisadi zonaların ilk yaradıcısı olub. Lakin indi o, bütün Avropa ölkələrində bərabər şəraitin olması üçün bundan geri çəkilir. Nazirlikdən bildiriblər ki, Azərbaycan Aİ-yə daxil olduğu halda, XİZ-in fəaliyyəti üçün müəyyən güzəştli dövr istəyəcək.
Qanun layihəsində XİZ üçün gömrük və vergi güzəştləri nəzərdə tutulub və hər bir zonanın güzəştlər paketi eyni olacaq. Vergi rejimi ərazidən, infrastruktur vəziyyətindən və zonanın potensialından, fəaliyyət sferasından asılı olacaq. Güzəştlər mənfəət vergisi, ƏDV, gəlir vergisi, əmlak vergisinədə aid edilə bilər.
