Azərbaycan, Bakı,01 may / Trend , müxbir S.Babayeva/ 2008-2015-ci illər Azərbaycanda meliorasiya və su təsərrüfatının inkişafı üzrə Dövlət Proqramı torpaq məhsuldarlığının və istehsalın 1,5-2 dəfəyə qədər artmasına imkan yaradacaq. Rəsmi mətbuatda cümə axşamı yayılan məlumata görə, bu barədə bu həftə dövlət başçısı İlham Əliyevin sədrliyi altında keçirilən meliorasiya, su təminatının yaxşılaşdırılması, suvarma, kanalizasiya sisteminin inkişaf layihələri üzrə iclasda Meliorasiya və Su Təsərrüfatı ASC -nin rəhbəri Əhməd Əhmədzadə bildirib.
Əhmədzadənin sözlərinə görə, 2008-2015-ci illər ərzində reallaşdırılacaq Proqram çərçivəsində 16 su anbarının tikintisi nəzərdə tutulub. Bu anbarların tutumu 722 mln. kub metr, suvarma kanallarının uzunluğu isə 825 kilometr təşkil edəcək. Əlavə olaraq suvarmaya 43,4 min hektar yeni torpaq sahəsinin ayrılması nəzərdə tutulub. Proqram çərçivəsində 118 kilometrlik dambaların inşası , 385 min hektar torpaq sahəsində isə, meliorasiya və suvarma işlərinin yaxşılaşdırılması nəzərdə tutulub.
Proqram, koordinasiya edən dövlət müəssisələri tərəfindən razılaşdırılıb və Nazirlər Kabineti tərəfindən təsdiq üçün prezidentə təqdim edilib.
