Azərbaycan, Bakı, 08 may / Trend , müxbir S.Babayeva/ Qazaxıstanın aprel ayından payıza qədər taxıl ixracına qadağa qoymasından sonra Azərbaycan alternativ taxıl tədarükçüləri axtarır.
"Ölkə hökuməti taxıl almaq üçün bir sıra dövlətlərlə danışıqlar aparır", - deyə Azərbaycanın Kənd Təsərrüfatı Nazirliyinin Bitkiçilik məhsullarının emalı, istehsalı və ərzaq ehtiyatlarının dövlət tənzimlənməsi şöbəsinin rəhbəri Sabir Vəliyev bildirib.
Kənd Təsərrüfatı Nazirliyinin nümayəndəsi potensial idxalçılar arasında Kanada və Avstraliyanı qeyd edib.
"Taxıl idxalı - mühüm məsələdir və onun həll edilməsi üçün ölkənin bütün dövlət idarələri cəlb edilib", - deyə cümə axşamı Vəliyev vurğulayıb.
Hazırda ölkədə real taxıl və un ehtiyatı həcmlərinin müəyyən edilməsi üçün monitorinq aparılır. Monitorinqə həftə ərzində yekun vurulacaq.
"Monitorinqdən sonra biz biləcəyik ki, nə qədər taxıl və un alınmalıdır", - deyə Kənd Təsərrüfatı Nazirliyinin nümayəndəsi bildirib.
Bu gün taxıla olan tələbatın təxminən 70 faizi daxili istehsal hesabına təmin edilir. Cari ildə əlavə 120 min ha taxıl əkin sahələri hesabına məhsul istehsalını 300-350 min ton artırmaq mümkün olacaq. Bu il Azərbaycanda buğda istehsalı 2,3 mln. ton həcmində proqnozlaşdırılır.
Azərbaycanda taxıla olan illik tələbat 3 mln. ton təşki edir ki, bunun da 1,5 mln. tonu ərzaq taxılının payına düşür.
Qazaxıstanın Azərbaycandakı səfiri Serik Primbetov bir gün əvvəl jurnalistlərə bildirib ki, onun ölkəsinin hökuməti üç nazirliyə Azərbaycan şirkətləri tərəfindən taxıl göndərilməsi məsələsinə, aprel ayından bu məhsula tətbiq edilən ixrac qadağası şərtləri nəzərə alınmaqla baxılması barədə tapşırıq verib.