Azərbaycan, Bakı, 16 may/ Trend , müxbir Ü.İsmayılova/ Əmək və Əhalinin Sosial Müdafiəsi Nazirliyi Azərbaycanda işsizlik üzrə müavinətin artırılması haqqında təkliflər hazırlayır. Bu barədə cümə günü nazirliyin məşğulluq idarəsinin rəhbəri Anar Bədəlbəyli məlumat verib.
"Nazirlik müavinətləri 45-55 manatadək artırmağı təklif edir", - Bədəlbəyli bildirib.
Hazırda Azərbaycanda işsizlik üzrə müavinət 24 manat təşkil edir. Ölkədə minimal əmək haqqı 60 manatdır.
Bədəlbəylinin sözlərinə görə, təkliflər yaxın vaxtlarda nəzərdən keçirilmək üçün Nazirlər Kabinetinə təqdim olunacaq.
O, hazırda məşğulluq xidmətlərində 48 mindən çox işsizin qeydiyyatdan keçdiyini və bunlardan 15-20 faizinin bu müavinəti ala biləcəyini bildirib.
Dövlət Statistika Komitəsinin məlumatlarına əsasən, yanvar-martda rəsmi olaraq qeydiyyatdan keçmiş işsizlərin sayı 451,3 min nəfər təşkil edib və onların 48 faizi qadınlardır. Azərbaycanda bir iş yerinə rəsmi olaraq qeydiyyatdan keçmiş dörd nəfər iddia edir.
Müəlliflə əlaqə saxlamaq üçün elektron ünvan: [email protected]