Azərbaycan, Bakı, 21 may / Trend müxbir E.İsmayılov/ "Akkord" şirkətlər qrupu Bakı-Quba-Rusiya sərhədi beton avtomobil yolunun tikintisi üzrə işlərə başlayıb. Bu barədə çərşənbə günü Azərbaycanın nəqliyat nazirinin müavini Musa Pənahov məlumat verib.
Pənahov bildirib ki, tikinti Azərbaycan prezidenti İlham Əliyevin yüksəkkeyfiyyətli və sürətli yolların yaradılması haqqında sərəncamı çərçivəsində həyata keçirilir.
Mayın 20-də yolun 16 kilometrinə beton örtüyünün tökülməsi üzrə ilk işlər başlayıb. "Bu yolun tikintisini qısa müddətdə başa çatdırmaq planlaşdırılır", - Pənahov bildirib.
"Akkord" şirkətlər qrupunun layihələrin idarə edilməsi departamentinin rəhbəri Məzahir Cəmilov çərşənbə günü bildirib ki, yeni beton yolun uzunluğu 120 km təşkil edir və dünən 16-134 kilometrdə işlər başlayıb.
Bu yol ikixətlidir, hər xəttin eni isə 12 metrdir. Tikinti işlərinin oktyabrda başa çatdırılması planlaşdırılır.
Departament rəhbəri bildirib ki, bu yolun tikintisi üçün bütün sahə boyunca istehsal gücü saatda 120 kubmetr beton olan dörd beton zavodu tikilib. Cəmilov işlərin paralel olaraq üç sahədə həyata keçiriləcəyini bildirib.
Hazırda şirkət Bakı-Şamaxa magistralının 15-68 kilometrinin, Bakı-Samur yolunun 28-45 kilometri və uzunluğu 36 kilometr olan Qazax-Gürcüstan sərhədi yolunun tikintisi üzrə işlər həyata keçirir. Bütün bu yollar asfaltdır.
Bu gün "Akkord" şirkətlər qrupu öz layihələrində ən müasir beynəlxalq standartlar tətbiq edir. "Akkord" 42 ölkənin daxil olduğu beynəlxalq layihələrin idarə edilməsi assosiasiyasının üzvüdür.
Müəlliflə əlaqə saxlamaq üçün elektron ünvan: [email protected]
