Azərbaycan, Bakı, 09 iyun / Trend , müxbir U.İsmayılova / Mayda Bakıda tikinti materiallarının qiyməti aprelə nisbətdə 6,1 faiz artıb. Ba haqda "MBA group" konsaltinq şirkəti bazar ertəsi məlumat verib.
Mayda yoxlama aparılan məhsullar arasında Azərbaycanda istehsal olunan materialların payı 41,4 faiz təşkil edib, bu da ötən ayların göstəricilərinə bərabərdir.
Mayda təşkilat tikinti materiallarının 105 növü və 48 çeşidi üzrə monitorinq keçirib, bunlardan 54 növ üzrə qiymət artımı, 14 növ üzrə qiymətin aşağı enməsi, digər 37 növ üzrə qiymətlərin stabil qaldığı müşahidə olunub.
Qiymət artımı əsasən karyer daşı (22 faiz), sement (21,9 faiz), çınqıl (5,9 faiz), ağac (3,5 faiz), DSP (2,8 faiz), şveller (1.7 faiz), dəmir təbəqə (12,5 faiz), sink təbəqə (6,4 faiz) və digər materiallar üzrə müşahidə olunub.
Qum (2,2 faiz), mismar (2,2 faiz), boru (8,8 faiz) üzrə isə qiymət azalması müşahidə olunub.
Monitorinqin nəticələrinə əsasən, mayda tikinti materiallarına qiymət artımı başlıca olaraq dünya bazarında enerji daşıyıcılarının bahalaşması səbəbindən baş verib. Ağacın bahalaşması istehsalda yaranmış mövsümi problemlərlə əlaqədardır.
Tikinti materiallarının bahalaşması bazarın fəallığına təsirsiz qalmayıb, beləki 2007-ci ilin analoji dövr göstəricisi ilə müqayisədə bazarın fəallığı 12,3 faiz azalıb. Hazırda bazarın fəallığına təsir göstərən başlıca faktorlardan biri kommersiya qeyri-yaşayış obyekti portfelinin artmasıdır.
Müəlliflə əlaqə saxlamaq üçün elektron ünvan: [email protected]