Azərbaycan, Bakı, 27 iyun / Trend , müxbir S.Ağayeva / Ukrayna Azərbaycana "Boqdan" markalı məktəb avtobusları tədarük etmək niyyətindədir. Bu markalı ilk avtobus artıq Bakya gətirilib və "Heydər Əliyev" Fonduna veriləcək. Bu barədə cümə günü Bakıda jurnalistlərə Ukraynanın Azərbaycandakı səfiri Boris Klimçuk məlumat verib.
Ukraynalı istehsalçılar bundan sonra Azərbaycanın nazirlik və idarələrində, lizinq şirkətlərində danışıqlar aparmaq və onlara öz məhsullarını təqdim etmək niyyətindədirlər.
Səfir bildirib ki, "Boqdan" korporasiyasının nümayəndə heyəti iyunun 30-u, iyulun 1-i tarixlərində Azərbaycana səfər edəcək.
"Boqdan" korporasiyası Ukraynada müxtəlif tipli avtonəqliyyat vasitələrinin istehsalı üzrə obyektlərin yaradılmasına istiqamətlənmiş layihələrin reallaşdırılması məqsədi ilə 2005-ci ilin fevralında yaradılıb. Onun tərkibinə 20 şirkət daxildir ki, bunların arasında "Lutskiy avtomobilnıy zavod" ASC, "Çerkasskiy avtobus", "Xyunday Motors Ukraina" və başqaları var.
Ötən il görülən işlərin nəticəsinə görə, korporasiya Ukraynada avtobus və yük maşınları istehsalçıları arasında birinci yeri tutub.
Məqalə müəllifi ilə əlaqə ünvanı: [email protected]