Azərbaycan, Bakı, 30 iyul/ Trend , muxbir E.İsmayılov/ "2008-2011-ci illər üçün Azərbaycan dəmir yollarının inkişafı üzrə Dövlət Proqramı"nın dəyəri, artan inflyasiya nəzərə alınmaqla, yeni texnologiyaların istifadə olunması ilə 1,25 mlrd. manatdan 2 mlrd. manata qədər artıb, çərşənbə günü nəqliyyat nazirinin müavini Musa Pənahov bildirib.
"Bu günlər artan inflyasiya nəzərə alınmaqla və dünya standartlarına cavab verən yeni texnologiyalardan istifadə edilməsi ilə əlaqədar layihənin qiyməti təxminən 2 mlrd. manat təşkil edəcək" - Pənahov bildirib.
Proqram çərçivəsində layihənin həyata keçirilməsinə 2009-cu ildə başlanması və dörd il ərzində başa çatdırılması nəzərdə tutulub. Proqramın həyata keçirilməsi nəticəsində Azərbaycanda dəmir yolu vasitəsilə yük daşımalarının həcminin ildə 20-25 mln. ton artacağı gözlənilir.
Proqram çərçivəsində Azərbaycan dəmir yollarının dünya standartları səviyyəsində hərəkətini təşkil etmək üçün iş aparılacaq. "Biz çalışacağıq ki, bu layihə vaxtında həyata keçirilsin", - Pənahov bildirib.
Proqram artıq hazırdır, bu yaxınlarda ölkə rəhbərliyi tərəfindən təsdiq ediləcəyi gözlənilir. Proqramın əsas istiqamətləri aşağıdakılardır: Azərbaycanın dəmir yollarında birgə islahatların keçirilməsi, idarəetmə sisteminin təkmilləşdirilməsi, infrastrukturun yenilənməsi, normativ hüquqi bazanın təkmilləşdirilməsi və beynəlxalq münasibətlərin genişləndirilməsi.
Proqramın böyük hissəsini beynəlxalq standartlara uyğun olaraq, dəmir yollarının yenidən qurulmasını təklif edən infrastrukturlu layihələrin həyata keçirilməsi təşkil edir. "Bu iş yük daşınmalarının inkişafını, sərnişinlərin hərəkəti üçün şəraitin yaradılmasını, hərəkət sürətinin artırılmasını, yüklərin vaxtında və təhlükəsiz çatdırılmasını təmin edir. Həmçinin yeindənqurma işləri Şimal-Cənub, Şərq-Qərb istiqamətlərində yük daşınmalarında gecikməməyə imkan verəcək", - Pənahov deyib.
Məqalə müəllifi ilə bu əlaqə ünvanı: [email protected]
