Azərbaycan, Lənkəran, 07 avqust/ Trend , müxbir P.Əliyeva/ Azərbaycanın Standartlaşdırma, Metrologiya və Patent üzrə Dövlət Agentliyi ölkənin cənubunda keyfiyyətsiz məhsul istehsal edən bir sıra müəssisələr aşkarlayıb. Agentliyin dairə idarəsinin rəhbəri Namiq Kərimovun verdiyi məlumata görə, pivə istehsalçısı "Nihad", çörək, şirniyyat və pendir istehsalçısı "Murad - S", Masallıda su istehsal edən Taleh-Y şirkətlərinin və Lənkəranda balıq sexlərinin fəaliyyətindəki çatışmazlıqlarla bağlı protokol tərtib edilib.
"Qısa müddətdə çatışmazlıqlar aradan qaldırılmasa, bu müəssisələr bağlanılacaq", - Kərimov deyib.
Ilin əvvəlindən ölkənin cənub regionlarında ümumilikdə 64 protokol tərtib edilib ki, bunun da 30-u son iki ayın payına düşür.
Azərbaycanın Standartlaşdırma, Metrologiya və Patent üzrə Dövlət Agentliyi 2001- ci ilin dekabrında ölkə prezidentinin fərmanı ilə yaradılıb. O, İcra Hakimiyyətinin standartlaşdırma, mertologiya, sertifikatlaşdırma və sənaye mülkiyyəti obyektlərinin mühafizəsi sahələrində dövlət siyasətinin formalaşdırılması və aparılması üzrə mərkəzi orqanıdır.
