Azərbaycan, Bakı, 05 sentyabr/ Trend , müxbir İ.Xəlilova/ Azərdəmiryolbank ASC $16 mln. məbləğində sindikatlaşdırılmış kreditin cəlb edilməsi üzrə Amerikanın ticarət-maliyyə fondu Rosemount Global və Portuqaliyanın Banif-Banco International do Funchal S.A maliyyə təşkilatı ilə kredit sazişini imzalamağa hazırlaşır, - cümə günü bankdan deyiblər. Bu sövdələşmədə başqa əcnəbi maliyyə institutları da iştirak edəcək.
Azərdəmiryolbank-ın səhmdarları mayın 15-də keçirilmiş ümumi iclasda kredit sazişini təsdiqləyiblər. Bankdan bildirdiklərinə görə, cəlb edilən vəsaitlər müxtəlif dövlətlərlə ticarətin aparılmasının maliyyələşdirilməsinə yönəldiləcək. Bununla yanaşı, səhmdarlar tərəfdaş ölkələrlə münasibətlərdə məhdudiyyət qoymurlar.
Azərdəmiryolbank-ın beynəlxalq maliyyə strukturlarından və özəl səhmdarlardan cəlb etdiyi maliyyə resurslarının ümumi həcmi $90 mln. ötür. Bank Beynəlxalq Maliyyə Korporasiyası (BMK) ilə də üç kredit xəttindən ibarət olan paket çərçivəsində kredit sazişini imzalamağa hazırlaşır. Avqustda Azərdəmiryolbank BMK ilə birinci kredit xəti üzrə ipotekanın inkişafına dair $5 məbləğində saziş imzalayıb. Lizinq əməliyyatlarının inkişafına və ticarətin maliyyələşdirilməsinə də müvafiq olaraq $5 mln. veriləcək.
Azərdəmiryolbank ölkənin birinci kommesiya bankı olmaqla, 1989-cu ildə təsis edilib. Bankın səhmdarları arasında Avropa Yenidənqurma və İnkişaf Bankı və holland maliyyə şirkəti kimi maliyyə institutları var. Azərdəmiryolbank-ın Bakıda və regionlarda 27 filialı və bank şöbəsi var.
Sentyabrın 5-nə Rəsmi valyuta məzənnəsi 0,8154 AZN/USD-dır.