Azərbaycan, Bakı, 07 oktyabr/ Trend , müxbir İ.Xəlilova/ Bakı yaxınlığında zibilin yandırılması üzrə ilk zavodun tikintisinin dəyəri 18 faiz - 408,28 mln. avroyadək artırılacaq.
Azərbaycanın İqtisadi İnkişaf Nazirliyinin xarici sərmayələr və texniki yardımın koordinasiyası şöbəsinin rəisi Əsgər Ələkbərovun çərşənbə axşamı bildirdiyinə görə, layihə, əlavə dəyər vergisi nəzərə alınmaqla, bahalaşacaq və bu, layihənin operatoru - Fransanın CNİM şirkti ilə müqavilədə öz əksini tapacaq.
Müqavilənin bu və ya gələn həftənin sonunadək imzalanacağı gözlənilir. O "açar təhvili (turn - key) tipli olacaq. Müqavilə DBO (Design - Build - Operate) prinsipi üzrə realizə ediləcək. Bu isə o deməkdir ki, zavodun layihələndirilməsi, tikintisi və əməliyyat xidmətinin göstərilməsinə görə məsuliyyət bütövlüklə bir icraçının - CNIM şirkətinin üzərinə düşəcək.
Layihə Fransa şirkətinin illik gücü 500 min ton bərk məişət tullantıları yandıracaq zavodun layihələndirməsini, tikintisini və 20 illik (+10 il uzatmaq imkanı ilə) istismarının həyata keçirməsini nəzərdə tutur. Zibilyandırma zavodu hər birinin yandırma gücü 250 min ton olan 2 xətdən və elektrik enerjisini istehsal edən turbindən ibarət olacaqdır. Təqdim olunan layihəyə əsasən, gələcəkdə zavodun gücü daha 250 min ton artırıla bilər. Məişət tullantılarının yandırılması nəticəsində, il ərzində təxminən 231,5 mln. kVt/saat elektrik enerjisi istehsal olunacaqdır. Yandırılmış tullantılardan qalan kül çöküntüsündən yol tikintisi prosesində istifadə etmək mümkün olacaq.
Hazırlanmış texniki- iqtisadi əsaslandırmaya əsasən, layihə 346 mln. avro qiymətləndirilir. Layihə, 2008 - ci ildən kreditlər, qrantlar və s. çərçivəsində malların, xidmətlərin, işlərin idxalına ƏDV - nin tətbiq edilməsi ilə bağlı bahalaşır.
Əsgərovun sözlərinə görə, başlanğıc mərhələdə layihəni dövlət büdcəsi hesabına maliyyələşdirmək nəzərdə tutulur. 2008 - ci il üçün Dövlət Investisiya Proqramında bu məqsədlərə 90 mln. manat, 2009 - cu il üzrə isə 70 mln. manat vəsait ayrılıb.
Tikintinin sonrakı mərhələsində kredit xətlərin cəlb edilməsi mümkündür. AYİB, Fransanın bu sahədə təcrübəsi olan BNP Paribas və Societe General bankları buna maraq göstərir. Bu növ layihələrdə kreditlər üzrə risklər Almaniyanın HERMES Ixrac Sığorta Agentliyi və Fransanın COFACE Ixrac Sığorta Agentliyi tərəfindən sığortalanır.
İqtisadi İnkişaf Nazirliyinin nümayəndəsi hesab edir ki, tikinti işləri 2008 - ci ilin sonuna- 2009 - cu ilin əvvəlinədək başlaya bilər. Zavodun tikilmə müddəti, araşdırmaların aparılması və ətraf mühitə təsir haqqında hesabatın hazırlanması üçün 3-4 ay da daxil olmaqla, müqavilə imzalandığı gündən 36 ay təşkil edir.
CNIM əsas avadanlığı onunla bir qrupa daxil olan Martin şirkətindən alacaq.
Hazırda Bakıda Sabunçu, Suraxanı və Qaradağ rayonları ərazisində yerləşən üç poliqon fəaliyyət göstərir. Onlardan ən böyüyü 1963 - cü ildən fəaliyyət göstərən tullantıların zərərsizləşdirilməsi üzrə Balaxanı qəsəbəsindəki poliqondur. Rəsmi məlumatlara əsasən, paytaxtda zibilin yığılması üzrə 2540 məntəqə var.
İlkin qiymətləndirmələrə əsasən, yeni kompleks ildə 600 min tondan çox zibil emal etməlidir ki, bu da bir - iki zavodun yaradılmasını nəzərdə tutur. İlkin hesablamalara görə, yeni kompleksin yaradılmasına $300-400 mln. xərclənib. Sonra məişət tullantılarının həcminin qiymətləndirilməsi 775 min ton məişət tullantısınadək artıb. Nəticədə, Azərbaycan paytaxtda və regionlarda, hər birinin gücü 500 min ton olan, iki zavod tikməyi qərara alıb.
Hər il Bakı üzrə adambaşına, orta hesabla, 350 kq tullantı yığılır.
Müəlliflə əlaqə saxlamaq üçün elektron ünvan: [email protected]
