Qazaxıstan, Almatı, 17 oktyabr/ Trend , müxbir İ.Xəlilova/Azərbaycanın İnvestisiya Şirkəti (AİŞ) Beynəlxalq İnkişaf Korporasiyası (BİK) və ABŞ - ın Beynəlxalq İnkişaf Agentliyinin yardımı ilə AİŞ - in sərmayə yatıracağı yerli şirkətlər üçün nəzərdə tutulmuş korporativ idarəetmənin model Məcəlləsini hazırlayıb. Bu barədə İnvestisiya Şirkətinin hüquqi ekspertiza və monitorinq departamentinin hüquq məsləhətçisi Aqşin Əlizadə Almatıda keçirilən "Orta Asiya və Qafqaz regionunda korporativ idarəetmə məsələlərinin işıqlandırılması"seminarında deyib.
Məcəllə AİŞ-in Müşahidəçi Şurası tərəfindən təsdiq ediləcək.
Əlizadənin sözlərinə görə, gələcək sərmayələr üçün şirkət seçiləndə, əsas diqqət onlarda korporativ idarəetmə stanadrtlarının tətbiqi ilə bağlı təcrübənin olmasına veriləcək. Məcəllə qüvvəyə minənədək, AİŞ BİK tərəfindən hazırlanmış korporativ idarəetmənin aparılması üzrə təlimatlara əsaslanır ki, onların da əsasında şirkətlərin monitorinqi keçirilir.
Məcəlləyə uyğun olaraq, şirkətlərdə səhmdarların sayından asılı olmayaraq, Müşahidəçi Şurasının olması vacibdir. Hazırkı qanunvericiliyiə əsasən, səhmdarların sayı 50 -dən çox olduqda Şura yaradılır.
AİŞ nümayəndəsinin fikrincə, belə vəziyyət şirkətlərin fəaliyyətini daha fəal edəcək; operativ qərarların qəbul edilməsi üçün səhmdarların toplaşmasını gözləməyə ehtiyac olmayacaq.
Şirkətlərdə daxili audit institutlarının tətbiq edilməsi də nəzərdə tutulub. "Ölkə parlamentinin 2007 -ci ildə qəbul etdiyi "Daxili audit haqqında Qanun", idarəetmə institutundan, Müşahidəçi Şurasından və ya səhmdarların iclasından asılı olmayaraq, daxili auditi zəruri edir", - AİŞ - in nümayəndəsi qeyd edib.
Korporativ idarəetmənin prinsiplərinə əsasən, şirkətlər Beynəlxalq Maliyyə Hesabatlılığı Sistemi (BMHS) əsasında maliyyə hesabatlarını hazırlamalı və onu müstəqil auditor tərəfindən təsdiq etdirməlidirlər. Bundan sonra şirkətlər illik hesabatlarını dərc etməlidirlər.