Azərbaycan, Bakı, 18 oktyabr/ Trend /Azərbaycan Ümumdünya Ticarət Təşkilatının (ÜTT) dekabrda Cenevrədə keçiriləcək işçi qrupunun iclasında iştirak etmək üçün lazımi sənədləri hazırlayıb, - ÜTT-Azərbaycan rəsmi saytında qeyd edilib.
Tarif və xidmətlər üzrə təkliflər və ÜTT üzvlərinin verdiyi suallarla bağlı cavablar da hazirdır.
Bu, işçi qrupunun sayca altıncı iclası olacaq və bununla yanaşı, ikitərəfli danışıqların keçirilməsi də planlaşdırılıb.
Azərbaycan artıq Oman Sultanlığı və Birləşmiş Ərəb Əmirlikləri ilə üzvlük şərtləri ilə bağlı ikitərəfli danışıqlar aparıb. İlk buna bənzər protokol Türkiyə ilə 2007 -ci ildə imzalanıb. ÜTT -yə üzvlük üzrə danışıqlar Qırğızıstan və Moldova ilə başa çatıb.
ABŞ və Avropa İttifaqı ilə danışıqlar davam etdirilir. Növbəti ilin əvvəlində Yaponiya, Kanada, Cənubi Koreya, Hindistan, Norveç, Şri -Lanka və Ekvadorla ikitərəfli danışıqların keçirilməsi məsələsi nəzərdən keçiriləcək.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunub.
