Azərbaycan, Bakı, 24 noyabr/ Trend , müxbir E.İsmayılov/ Heydər Əliyev, Babək və Şah İsmayıl Xətai prospektlərinin kəsişməsində inşa edilən iri yol qovşağı dekabrda istifadəyə veriləcək. Bu barədə bazar ertəsi Azərbaycan Nəqliyyat Nazirliyindən bildiriblər.
"Dekabrda bu avtomobil yol qovşağının istifadəyə verilməsi planlaşdırılır, yəni ilin sonunadək o, istismara veriləcək", - deyə mənbə bildirib.
Yol qovşağı "Akkord" Şirkətlər Qrupu tərəfindən tikilir. Şirkət artıq tikilən obyektlərdə test işləri aparıb. Bu işlər Rusiyanın "IMIDIS" institutunun mütəxəssisləri tərəfindən aparılıb. Test zamanı körpünün yükgötürmə qabiliyyəti, stabilliyi, hərəkət rahatlığı yoxlanılıb. Şirkətdən əvvəllər verilən məlumata görə, mütəxəssislər tərəfindən yeni yol qovşağının keyfiyyətinə müsbət qiymət verilib.
Qovşağın tikintisinə 2006 - cı ilin avqustunda başlanıb, 2000 metr uzunluğundadır. O, dörd nəqliyyat körpüsü, iki tuneldən ibarətdir. Layihə çərçivəsində, buradan keçən dəmir yolu körpüsü üzrə də yenidənqurma işləri aparılıb.
Bu layihənin reallaşdırılması zamanı ilk dəfə olaraq yol döşəməsinin isitmə sistemi tətbiq edilib. Temperatur - 4 S°- dək düşdüyü zaman körpünün istilik sistemi avatomatik işə düşür, tempertur 0 S°-dək qalxdıqdan sonra sistem sönür.
Bütün işlər Azərbaycan prezidentinin "2006 -2007- ci illərdə Bakı şəhərində nəqliyyat sisteminin təkmilləşdirilməsi haqqında" sərəncamına əsasən, Bakıda nəqliyyat infrastrukturunun işinin yüngülləşdirilməsi layihəsi çərçivəsində həyata keçirilir.
Məqalə müəllifi ilə əlaqə ünvanı - [email protected]
