Gürcüstan, Tbilisi, 24 noyabr/ Trend , müxbir N.Kirtsxaliya/ "Gürcüstan iqtisadiyyatı bizim təsəvvür etdiyimizdən daha dayanıqlı olub və Rusiyanın hərib təcavüzü bunu sübut edib", - iqtisadiyyat naziri Yekaterina Şaraşidze bazar ertəsi avqust hadisələrinin öyrənilməsi üzrə müvəqqəti parlament komissiyasının iclasında bildirib.
"İqtisadiyyat ölkənin infrastrukturu kimi, bu sınağa davam gətirib. Biz Rusiya tərəfdən vəziyyəti qızışdıracaq müəyyən gərginlik gözləyirdik və İqtisadiyyat Nazirliyi müəyyən sarsıntılara hazır idi. Biz bütün iqtisadi obyektlərə nəzarət edirdik", - Şaraşidze vurğulayıb.
Onun sözlərinə görə, Rusiya tərəfi Poti limanı, Tbilisi hava limanı, dəmir yoluna zərbələr endirib.
"Biz hər saat təyyarələrin uçuşları, limanlardakı gəmilər, dəmir yolunun vəziyyəti haqqında məlumat alır və daim vəziyyətə nəzarət edirdik", - nazir bildirib və əlavə edib ki, Gürcüstan hökuməti həm də məhsulların qiymətinə nəzarət edib.
Şaraşidzenin sözlərinə görə, avqustun 9-da Tsxinvali və Qori rayonlarından böyük sayda qaçqın kütləsinin yerləşdirilməsi üçün yer və evlər ayrılıb.
"Biz bütün obyektləri elektrik enerjisi ilə təmin edə və onlar üçün münasib yaşayış şəraiti yarada bildik", - nazir bildirib.
Müəlliflə əlaqə saxlamaq üçün elektron ünvan: [email protected]
