Azərbaycan, Bakı, 05 yanvar/ Trend , müxbir S.Babayeva/ "2009-cu ildə Azərbaycanda quş qripi virusunun aşkar edilməsi üzrə birinci monitorinq yanvarın 12-də başlayacaq", - Kənd Təsərrüfatı Nazirliyi yanında Dövlət Baytarlıq Xidmətinin mətbuat katibi Yolçu Xanvəli bazar ertəsi bildirib.
Onun sözlərinə görə, "monitorinq iki həftə davam edəcək, laborator tədqiqatları vəhşi və ev quşları nümunələrinin əsasında aparılacaq".
Abşeron yarımadası və yaxın əraziləri, Dəvəçi, Salyan, Ağcabədi və Lənkəran rayonlarını, Xəzərin sahilyanı xəttini əhatə edən monitorinq Baytarlıq Xidməti, Ekologiya və Təbii Sərvətlər, Səhiyyə nazirlikləri, Azərbaycan Ovçular Cəmiyyətinin mütəxəssislərindən ibarət xüsusi komissiya tərəfindən aparılacaq.
"Köçəri quşların fəal miqrasiyasına baxmayaraq, ölkədə epizootik vəziyyət sabit qiymətləndirilir. Bu səbəbdən, monitorinqlər ayda bir dəfə aparılır. Zərurət yaranarsa, onların sayını ikiyədək artırmaq olar", - Xanvəli deyib.
Monitorinqin yekunları yanvarın 23-də elan ediləcək. Əvvəlki monitorinq Azərbaycanda quş qripi virusunu aşkar etməyib.
Müəlliflə əlaqə saxlamaq üçün elektron ünvan:[email protected]
