Azərbaycan, Bakı, 09 yanvar/ Trend , müxbir İ.Xəlilova/ Dünya Bankı (DB) Cənubi Qafqaz ölkələri üzrə yeni regional direktor təyin edib. Bu vəzifəni Əsəd Aləm tutub. O, bu vəzifədə Donna Douset Koyrollonu əvəz edib, - Bankın Bakı nümayəndəliyindən cümə günü bildiriblər. [Əsəd Aləm bu vəzifəyə təyin edilənədək DB - də sektor meneceri işləyib.]
O, yanvarın sonunda, yeni və əvvəlki direktorların Bakıya səfəri zamanı Azərbaycan hökumətinə təqdim ediləcək. Aləmin təyinatı Douset-Koyrollonun təqaüdə getməsi ilə bağlıdır, - nümayəndəlikdən bildiriblər.
Səfər zamanı ölkə hökumətinin bankla ümumi əməkdaşlıq məsələləri müzakirə ediləcək. Bundan başqa, 2010 - cu ilədək Dünya Bankının Azərbaycan üzrə strategiyası çərçivəsində proqramların realizəsinin, Bankın gələcək planlarının icmalı və mövcud layihələrin vəziyyəti ilə tanışlıq aparılacaq.
Ötən il DB Azərbaycanda Beynəlxalq İnkişaf Assosiasiyasının (BİA DB - nin qrupuna daxildir) xətii üzrə güzəştli şərtlərlə maliyyələşdirməni dayandırıb. Bank maliyyələşdirməni daha kasıb ölkələrə, xüsusilə də Afrika ölkələrinə yönəltmək niyyətindədir.
Ölkə hökuməti ötən il iyunun sonunda başa çatmış 2008 - ci maliyyə ilində DB - dən Azərbaycanın korporativ və dövlət sektorlarında hesabatlılıq (CAPSAP), təhsil sahəsində islahatların üçüncü mərhələsi, su təchizatı və kanalizasiya sisteminin inkişafı, sosial təminata yardım, məcburi köçkünlərin sosial inkişafı layihələrinə və Azərbaycanın kənd sərmayələrinə altı güzəştli kredit ala bilib. Bu proqramların realizəsinə 121 mln. dollar ayrılıb.
ÜDM - in adambaşına düşən həcmi 1280 dolları ötməyən ölkələr bu meyar altına düşürlər. Azərbaycan DB - nin BİA - dan kredit almaq üçün əsas meyar qismində müəyyən etdiyi bu gəlir səviyyəsini keçib.
İndiyədək DB Azərbaycanda ümumi dəyəri 2 mlrd. dollardan çox olan 42 layihəni maliyyələşdirib. Yalnız ötən il ərzində bank 13 layihənin maliyyələşdirməsinə 1,251 mlrd. dollardan çox vəsait yönəldib, bununla da, dörd illik strategiya büdcəsini iki ilə mənimsəyib.
Qarşıdakı iki ildə (2009 - 2010 -cu illər) DB ölkəyə 1 mlrd. dollardan çox kredit ayırmağa hazır olduğunu bildirib. Bu vəsaitlər kommersiya şərtləri üzrə - Beynəlxalq Yenidənqurma və İnkişaf Assosiasiyasının şərtləri ilə veriləcək.
Müəlliflə əlaqə saxlamaq üçün elektron ünvan: [email protected]
