Azərbaycan banklarının əksəriyyəti hələ də istehlak kreditlərinin verilməsini bərpa etməyib
Azərbaycan, Bakı, 26 yanvar/ Trend , müxbir N.İsmayılova/
2009-cu ildə Azərbaycan banklarının əksəriyyəti hələ də istehlak kreditlərinin verilməsini bərpa etməyib. Bu, kredit təşkilatlarının bazar ertəsi aparılmış sorğusunun nəticələrinə görə aydın olub.
İlin əvvəlindən istehlak kreditlərinin verilməsinə başlamağa hazırlaşan banklardan bildiriblər ki, bərpa prosesi hələ də başa çatdırılmayıb. Borcların verilməsini davam etdirən bəzi banklar öz kredit siyasətlərini sərtləşdiriblər ki, bu da biznes-kreditləşməyə təsir göstərib.
Sorğu edilmiş bankların siyahısına daxil olub: Rabitə Bank, Nikoil Bank, Royal Bank, Azərbaycan Sənaye Bankı, Parabank, NBC Bank, Bank of Baku, Azərdəmiryolbank, Kapital Bank, Access Bank, Əmrah Bank
Rabitə Bankdan bildiriblər ki, bank, illik 36-42 faiz dərəcəsi üzrə 18 ayadək müddətlə 1000 manatadək məbləğdə istehlak kreditlərinin verilməsini bərpa edib. Bank biznes-kreditlərin verilməsini də sərtləşdirib. İndi bu kreditlər iki il müddətinədək və əmlakın girov qoyulması ilə təklif edilir. Kreditlər üzrə faiz dərəcəsi ildə 30-36 faiz təşkil edir. 2008-ci ildə faiz dərəcəsi 26-36 faiz civarında dəyişirdi.
Nikoil Bank üç min manatdan böyük məbləğdə istehlak kreditləri verir. Bankın tələbi əmlakın girov qoyulmasıdır. Bankdan bildiriblər ki, kiçik istehlak kreditlərinin verilməsinin bərpası fevralın sonunadək mümkündür. Nikoil Bank biznes-kreditlərin verilməsini dayandırmasa da, onların verilmə müddətini iki ildən 1 ilədək azaldıb. Bank kreditləri manatla, 27 faiz dərəcə üzrə verir. Əvvəllər bank 22 faiz dərəcə üzrə Avropa valyutasında da kreditlər versə də, 2009-cu ildən onların verilməsi dayandırılıb.
Azərbaycan Sənaye Bank-dan istehlak kreditlərinin verilməsini dayandırdıqlarını bildiriblər. Bank biznes-kreditləri maksimum bir il müddətinə verir. Ötən il isə müddət bir ildən beş ilədək təşkil edirdi. 2009-cu ildə faiz dərəcələri 2008-ci ildəki 24-26 faizdən 22-24 faizədək dəyişdirilib.
NBC Bank avtomobil kreditləşməsini davam etdirir. Bank qalan növ kreditlərin verilişini müvəqqəti dayandırıb.
Parabank iki il müddətinə və 30-32 faiz civarında faiz dərəcəsi ilə yalnız biznes-kreditlər verir.
Bank of Baku-dan bildiriblər ki, heç bir dəyişiklik olmadan əvvəlki rejimdə bütün növ kreditlərin verilməsini davam etdirirlər.
Azərdəmiryolbank istehlak kreditlərinin verilməsini dayandırmasa da, indi borcu yalnız bankın tərəfdaşı olan şirkətlərlə əməkdaşlıq edən fiziki şəxslər ala bilər.
Royal Bank-da biznes-kreditlərin verilməsi dayandırılıb. Lakin bank istehlak kreditlərinin verilişini bərpa edib. Bu kreditlər 30 faiz dərəcə ilə iki il müddətinə təqdim olunur.
Əmrah Bank kreditləşməni bərpa etməyərək, hələ də gözləmə mövqeyi tutmaqda davam edir.
Kapital Bank yeni, daha yüksək dərəcələrlə kreditlərin verilməsini bərpa edib. Bütün növ kreditlər üzrə illik faiz dərəcələri bir,bir yarım faiz artıb. Bu tədbirlər kompleksi daha optimaldır. Belə ki, bank öz risk və itkilərini daha da azaltmaq niyyətindədir, - Kapital Bank-ın rəhbərliyi hesab edir.
AccessBank bütün növ kreditlərin verilməsini davam etdirir. Ötən il ərzində bankın kredit portfeli 84 faiz artaraq, 200 mln. dolları ötüb. Bankdan kredit alan müştərilərin sayı da 50 faiz artıb - 2007-ci ilin sonunda onların sayı 46 000 nəfər olduğu təqdirdə, indi bu göstərici 70 000 nəfər təşkil edir.
"Maliyyə dünyasında vəziyyətin mürəkkəb olmasına baxmayaraq, 2008-ci il AccessBank üçün çox uğurlu oldu və bankın uğurları günbəgün artır. Hər ay bütün ölkə üzrə 4000-dən artıq sahibkar AccessBank-dan yeni kreditlər alıb", - AccessBank-ın Baş meneceri Endryu Pospilovski bildirib.
Yanvarın 26-na olan cari mübadilə məzənnəsi -- 0,8052 AZN/USD.
Müəlliflə əlaqə saxlamaq üçün elektron ünvan: [email protected]
