Azərbaycan, Bakı, 02 fevral/ Trend , müxbir İ.Xəlilova/
Alman İnkişaf Bankı KfW daşınmaz əmlakın vahid qeydiyyatı və kadastrı sisteminin yaradılması layihəsinin həyata keçirilməsi üçün əsas olan konsepsiya mərhələsinin hazırlanması məqsədilə Azərbaycana 450 min avro məbləğində qrant ayırıb, - KfW-in Bakı ofisinin rəhbəri Natiq Abdullayev bazar ertəsi bildirib.
"Bu gün qrant sazişini imzalamaq üçün Azərbaycanın Daşınmaz Əmlakın Dövlət Reyestri Xidmətinə təqdim etdik", - Abdullayev deyib.
29 dekabr tarixli sərəncamla sazişin imzalanması üçün səlahiyyətlər dövlət xidmətinin rəhbəri Arif Qaraşova verilib.
Abdullayevin sözlərinə görə, əlavə tədbirlər haqqında noyabr qərarına əsasən, konsepsiya mərhələsinin yekunları üzrə KfW-in proqramının Dünya Bankının kadastrın yaradılması sahəsindəki layihəsini nə dərəcədə tamamlayacağı məlum ola bilər.
Bankın texniki yardımı 18 aya hesablanıb və yardım çərçivəsində torpaqölçmə üçün özəl sektorun cəlb ediləcəyi gözlənilir. Sonradan özəl sektor layihə çərçivəsində xəritənin yaradılmasında da iştirak edəcək. Bankın Bakı ofisinin rəhbərinin rəyinə görə, layihənin əsası hazırlandıqdan sonra KfW tərəfdən layihə üçün maliyyələşdirmənin həcmi də müəyyən ediləcək.
Alman bankı KfW əvvəlcə kadastrın yaradılması layihəsinə 2,5 milyon avro kredit, təşkilat-benefisiarın institusionallaşmasına isə 1 mln. avro qrant ayırmağa hazır olduğunu bildirmişdi.
Ötən ilin yanvarında bank Azərbaycanın Daşınmaz Əmlakın Dövlət Reyestri Xidməti ilə Anlaşma protokolu imzalayıb.
Layihə torpaqların, sahələrin və daşınmaz əmlakın qeydiyyatının aparılması üçün Gəncə şəhəri və Şəki rayonunda sistemli kadastr uçotunun aparılmasını nəzərdə tutur. Geodeziya tədqiqatları əsasında onların dəqiq koordinatları kadastr xəritəsinə daxil ediləcək.
KfW-in daşınmaz əmlakın qeydiyyatı layihəsi Dünya Bankının artıq həyata keçirdiyi layihədən məhz geodeziya tədqiqatlarının aparılmasına yanaşma və bütün torpaq sahələri və daşınmaz əmlakın koordinatlarının dəqiqləşdirilməsi ilə fərqlənəcək. DB-nin Azərbaycan ərazisinin 40 faizini əhatə etməklə qeydiyyatın aparılacağı layihəsində bu, vəziyyətdən vəziyyətə - daşınmaz əmlakın alqı və ya satqı vaxtlarında ediləcək. DB-nin Azərbaycanda daşınmaz əmlakın qeydiyyatı layihəsinin dəyəri 38,57 мilyon dollar təşkil edir və bunun 30 milyon dolları bankın kreditinin payına düşür.
Müəlliflə əlaqə saxlamaq üçün elektron ünvan: [email protected]
