Türkmənistan, Aşqabad, 11 mart / Trend , müxbir, H.Həsənov /
Ukraynanın "Küləklər qızılgülü" (Windrose) aviadaşıyıcısı aprelin 27-dən etibarən Kiyev-Aşqabad-Kiyev istiqamətində müntəzəm uçuşlar həyata keçirəcək, - şirkətin press-relizində bildirilib.
Reyslərin Boeing 737-800 təyyarəsi ilə həftədə bir dəfə, iyun ayından etibarən isə həftədə iki dəfə həyata keçirilməsi gözlənilir. Hava gəmisinin tutumu 174 sərnişin - biznes-klasdakı yerlərin sayı 18, ekonomklasdakı yerlərin sayı isə 156-dır.
Birtərəfli uçuşların qiyməti aeroport rüsumu (30 dollar) daxil olmadan 320 dollar təşkil edir. Bundan əvvəl, Astana (Qazaxıstan) və Daşkənd (Özbəkistan) marşrutları açılacaq. Sərnişinlər biletləri aviakompaniyanın veb-saytından əldə edə bilərlər.
"Ukraynadan Mərkəzi Asiya ölkələrinə olan reyslər, hətta strateji istiqamətlər şirkətimizin fəaliyyətində mühüm yer tutur", - press-relizdə aviaşirkətin prezidenti Vladimir Kamençukun sözlərindən sitat gətirilib.
"Küləklər qızılgülü" təyyarələrin Mərkəzi Asiya regionunda Ukrayna diasporunun, biznesmenlərin və Mərkəzi Asiyadan olan Ukraynada təhsil alan tələbələrin hesabına doldurulacağını nəzərdə tutur. Türkmənistan marşrutunun açılmasında, xüsusilə Ukraynanın Aşqabaddakı səfirliyinin böyük yardımı olub.
2003-cü ildə əsası qoyulmuş "Küləklər qızılgülü" avia şirkəti hazırda Ukraynanın bütün regionlarında çarter daşımaları, həmçinin Xarkov-İstanbul və Kiyev-Moskva müntəzəm beynəlxalq reyslərini həyata keçirir.
Məqalə müəllifi ilə əlaqə ünvanı: [email protected]
