Azərbaycan, Bakı, 08 aprel / Trend , müxbir S.Əliyev /
Gəncə avtomobil zavodu (Azərbaycan) apreldə Minsk traktor zavodu (Belarus) ilə Azərbaycanda "Belarus" markalı traktorların istehsalı üzrə birgə müəssisənin yaradılmasına dair saziş imzalamağı planlaşdırır. Bu barədə çərşənbə günü Azərbaycan müəssisəsinin rəhbəri Xanlar Fətəliyev bildirib.
"Əsas satış bazarı kimi Türkiyə nəzərdən keçirilir. Ötən il bu ölkəyə traktor idxalı 8 min ədəd daxili istehsal ilə yanaşı, təqribən 23 min ədəd təşkil edib", - deyə Fətəliyev bildirib.
Yaxın vaxtlarda Gəncə zavodu Türkiyədə öz nümayəndəliyini açmaq niyyətindədir. Nümayəndəlik İstanbulda yerləşəcək.
Bu il ərzində Gəncə zavodu 300-500 traktor satmaq niyyətindədir. Lakin qanunvericiliyə əsasən, Türkiyə ərazisində satış həyata keçirmək üçün satışdan sonra tam texniki xidmət təqdim etmək və onların bütün ölkə ərazisində təmiri üçün istehsal obyektləri yaratmaq lazımdır. Bu məsələnin həlli üçün Gəncə zavodu Türkiyə şirkətlərindən biri ilə tərəfdaşlıq münasibətləri qurmaq niyyətindədir. Fətəliyev bildirib ki, hazırda bu məsələ üzrə danışıqlar davam etdirilir.
Gəncə avtomobil zavodu Minsk traktor zavodunun məhsullarını toplayır. Hazırda Azərbaycanda traktorların yığılması üzrə birgə müəssisənin yaradılması məsələsi həll olunur. Müəssisənin nəzərdə tutulan istehsal gücü ildə 8-10 min traktor təşkil edir. Traktorların İran, Türkiyə, Gürcüstan və Rusiyanın cənubunda satılması planlaşdırılır.
Marketinq araşdırmalarına əsasən, zavod bu gün mövcud sahələrdə yerli bazar üçün 5 min ədədədək illik istehsal imkanlarına malikdir.
Minsk avtomobil və traktor zavodlarının istehsalı olan yük avtomobilləri və traktorlarının bütün qammalarının Azərbaycanda yığılması və satışı üzrə müqavilə 2006-cı il noyabrın sonunda Minskdə imzalanıb.
Yığım, sahəsi 15 min kvadrat metr olan ərazidə həyata keçirilir.
Gəncə şəhəri Azərbaycanın qərbində, Bakıdan 265 km. məsafədə yerləşir.
Məqalə müəllifi ilə əlaqə ünvanı: [email protected]