Azərbaycan, Bakı, 30 aprel / Trend , müxbir İ.Xəlilova /
Dünya maliyyə böhranı dövründə gözlənilməz risklərdən yayınmaq məqsədi ilə Azərbaycanda qeyri-bank kredit təşkilatları (QBKT) üçün mikromaliyyələşdirmə üzrə maksimal limit iki dəfə azaldılıb. Bu barədə cümə axşamı Azərbaycan Mikromaliyyələşdirmə Assosiasiyasının (AMA) icraçı direktoruJalə Hacıyeva bildirib.
"Mikromaliyyə təşkilatları kreditlərin maksimal məbləğini müəyyən müddətə 10 min manatdan 5 min manatadək endirmək qərarına gəlib", - deyə Hacıyeva bildirib.
Bu gün ölkədə fəaliyyət göstərən 47 bankdan 14-də mikromaliyyə xidmətləri göstərir. Banklar QBKT-dən fərqli olaraq mikrokreditləri 5 min manatdan 20 min manatadək verirlər.
Bununla yanaşı, kredit təşkilatları riskli rezervləri artırmaq məcburiyyətindədirlər, çünki kreditlərin 30 gün müddətindən artıq qaytarılmama halları var. Lakin kredit faizləri üzrə dəyişikliklər müşahidə olunmur.
Ölkədə fəaliyyət göstərən 32 mikromaliyyə təşkilatından 24-ü AMA-nın üzvüdür, 2003-cü ildə onların sayı 10 idi. Mikromaliyyə təşkilatlarının, o cümlədən banklarının kredit portfeli 2008-ci il 31 dekabr tarixinə olan vəziyyətə görə, 554,3 mln. dollar təşkil edib. Fəal müştərilərin sayı 319 mindən çoxdur.
Bu gün mikromaliyyə təşkilatları cəlbedilən vəsaitlər əsasında fəaliyyət göstərir. Hacıyeva bildirib ki, borclanma ilə bağlı problem, xüsusilə belə bir taktikaya yıyələnməyən yeni təşkilatlarda, həmçinin kiçik həcmdə kapitallaşmaya malik kredit təşkilatlarında olur.
Məqalə müəllifi ilə əlaqə ünvanı: [email protected]
